Երեւան քաղաքի առաջին ատեանի ընդհանուր իրաւասութեան դատարան ներկայացուած է ապօրինի ծագում ունեցող գոյքի բռնագանձման վերաբերեալ երրորդ հայցադիմումը, որ ընդունուած է վարոյթ:
Այս մասին յայտնած են Գլխաւոր դատախազութենէ:
«Համաձայն վերջինի՝ ՀՀ գլխաւոր դատախազութեան ապօրինի ծագում ունեցող գոյքի բռնագանձման գործերով վարչութիւնը պահանջ է ներկայացրել դատարանին ՀՀ նախկին բնապահպանութեան նախարար Ա. Յարութիւնեանից, նրա հետ փոխկապակցուած 2 անձանցից յօգուտ Հայաստանի Հանրապետութեան բռնագանձել մասնաւորապէս՝
– Երեւան քաղաքում գտնուող 2 բնակարանները, բնակելի տունը, հիւրանոցաճաշարանային համալիրը, ինքնաշարժի տնակը, Արագածոտնի եւ Գեղարքունիքի մարզերում գտնուող 2 հողամասերը (ամբողջութեամբ, որոշ դէպքերում՝ մասնակի), իսկ անհնարինութեան դէպքում՝ դրանց միջին շուկայական արժէքը, որը ընդհանուր կազմում է աւելի քան 2 միլիառ 500 միլիոն դրամ,
– 3 բաժնետիրական ընկերութիւնների բաժնետոմսերը, որոնցից միայն մէկ ընկերութեան անշարժ գոյքի շուկայական արժէքը կազմում է աւելի քան 8․166․400․000 ՀՀ դրամ,
– դրամատում ներդրուած 1․661․628 ԱՄՆ տոլար աւանդը,
– 4․391․805․299 ՀՀ դրամ որպէս ապօրինի դրամական միջոցների մնացորդ, ինչպէս նաեւ 272․975․855 միլիոն ՀՀ դրամ, որը չի հիմնաւորուում անձի օրինական եկամուտներով, ունի ապօրինի ծագում եւ հնարաւոր չէ բռնագանձել՝ հիմք ընդունելով ապօրինի ծագում ունեցող գոյքի բռնագանձման մասին օրէնքի 20-րդ յօդուածի 4-րդ մասը:
Առաջիկայում վարչութեան կողմից այլ գործերով, որոնցով արդէն իսկ կիրառուել են հայցի նախնական ապահովման միջոցներ, եւս կը ներկայացուեն ապօրինի գոյքի բռնագանձման հայցադիմումներ»։
