ՀՀ Արտաքին գործոց նախարար՝ Արարատ Միրզոյեան ու ՌԴ արտաքին գործոց նախարար՝ Սերկէյ Լաւրով Նոյեմբեր 1-ին հեռախօսազրոյց ունեցած են: Այս մասին յայտնած է ՌԴ ԱԳՆ պաշտօնական կայքը:
Նախարարները քննարկած են Հայաստանի, Ատրպէյճանի եւ Ռուսաստանի ղեկավարներու 2020 թուականի Նոյեմբեր 9-ի եւ 2021 թուականի Յունուար 11-ի պայմանաւորուածութիւններու կատարման ընթացքին վերաբերող հարցեր՝ հաշուի առնելով այն, որ կը լրանայ լիակատար զինադադարին ուղղուած նոյեմբերեան եռակողմ փաստաթուղթի մէկ տարին: Յատուկ ուշադրութիւն դարձուած է մարդասիրական՝ պահուող անձերու վերադարձի, ականապատ տարածքներու քարտէզներու տրամադրման, մշակութային եւ կրօնական ժառանգութեան պահպանման հրատապ խնդիրներու լուծման:
Երկու երկիրներու Արտաքին Գործոց ղեկավարները «ճշգրտած են ժամերը» հայ-ատրպէյճանական սահմանին լարուածութեան վերացման, Հարաւային Կովկասի փոխադրային եւ տնտեսական բոլոր կապերու ապաշրջափակման, տարածաշրջանային համագործակցութեան համար բարենպաստ մթնոլորտ ստեղծելու վերաբերեալ հարցերու շուրջ:
Ընդգծուած է Հայաստանի եւ Ատրպէյճանի միջեւ սահմանային միջադէպերու քաղաքական եւ դիւանագիտական կարգաւորման ուղղուած ջանքերու շարունակականութեան կարեւորութիւնը: Անդրադարձ կատարուած է հայ-ռուսական համագործակցութեան արդիական գործօններուն՝ հաշուի առնելով տարբեր մակարդակներով առաջիկայ երկկողմանի շփումները: Երկու երկիրներու ԱԳ ղեկավարները փաստած են դաշնակցային համագործակցութեան առաջանցիկ զարգացումը: Անոնք քննարկած են նաեւ միջազգային եւ տարածաշրջանային տարբեր հարցեր:
