Հայաստանի Կառավարութիւնը տեղեկացուց որ այսօր՝ Յուլիս 3-ին ռուսական կողմի միջնորդութեամբ Հայաստան վերադարձած են Ատրպէյճանի կողմէ գերեվարուած 15 հայեր:
«Հայկական կողմը որպէս բարի կամքի դրսեւորում Ատրպէյճանին փոխանցած է Ֆիզուլիի ու Զանգելանի շրջաններու ականապատ դաշտերու քարտէզները», – կը հաղորդէ Հայաստանի կառավարութիւնը` ներկայացնելով հայրենիք վերադարձած 15 հայ գերիներու անունները:
Անոնք բոլորը Շիրակի մարզէն են.
1. Յակոբեան Վոլոդիա Վաչականի
2. Ասատրեան Գէորգ Նորայրի
3. Գասպարեան Գոռ Վահրամի
4. Ենգոյեան Սիսակ Գրիշայի
5. Կարապետեան Եուրի Տիգրանի
6. Մահտեսեան Էտկար Վաչականի
7. Մինասեան Արամ Գառնիկի
8. Մինասեան Մկրտիչ Սիմոնի
9. Պետրոսեան Ալպերթ Կամոյի
10. Պօղոսեան Արմէն Եղիազարի
11. Սեդրակեան Ռոմիկ Միսակի
12. Սէֆիլեան Կամօ Կարէնի
13. Ասլանեան Եղիշ Յովհաննէսի
14.Գէորգեան Գրիգոր Գէորգի
15. Մանուկեան Անդրանիկ Տիգրանի
Հայաստանի կառավարութիւնը շնորհակալութիւն կը յայտնէ Ռուսաստանին միջնորդական դերակատարման համար:
Նախապէս Ատրպէյճանի արտաքին գործոց նախարարութիւն եւս հաստատած էր այս լուրը` նշելով, որ կը վերադարձուին 15 հայեր, որոնք դատարանի որոշմամբ դատապարտուած են ազատազրկման, եւ որոնց պատժի ժամկէտը լրացած է:
Յիշեցնենք, որ Նոյեմբերի 9-ի եռակողմ յայտարարութենէն յետոյ Խծաբերդի շրջանին մէջ գերեվարուած շիրակցի 14 ռազմագերիներէն 12-ը Պաքուն երէկ դատապարտած էր 6-ամսեայ, իսկ 2-ը՝ Հրաչ Աւագեանը եւ Գեղամ Սերոբեանը, 4 տարուայ ազատազրկման:
Նախքան այս` վերջին անգամ Յունիսի 12-ին հայրենիք վերադարձած էին15 գերիներ, երբ հայկական կողմը Պաքուին փոխանցեց Աղդամի ականապատման քարտէզը: Այսպիսով, պատերազմէն յետոյ Ատրպէյճանէն Հայաստան վերադարձան 103 գերիներ, նաեւ Պէյրութ վերադարձաւ լիբանանահայ Մարալ Նաճարեանը:
