Home ԳԼԽԱՒՈՐ ԼՈՒՐԵՐ Գեղարքունիքի Մէջ Կը Նախատեսուի Ռուս Սահմանապահներ Տեղակայել

Գեղարքունիքի Մէջ Կը Նախատեսուի Ռուս Սահմանապահներ Տեղակայել

by MassisPost

Ռուս սահմանապահներու տեղակայման ու սահմանէն Հայաստանի եւ Ատրպէյճանի զինուած ուժերու ետ քաշուելու շուրջ հայկական կողմը կը բանակցի Ռուսաստանի հետ, լրագրողներուն այսօր՝ Յունիս 22-ին տեղեկացուցած է Զինուած ուժերու Գլխաւոր շտաբի պետը։
Արտակ Դաւթեան, սակայն չէ յստակացուցած, թէ խօսքը միայն Գեղարքունիքի՞ սահմանի մասին է, թէ՞ նաեւ Սիւնիքի։ Այնուհանդերձ պաշտօնեան համոզմունք յայտնած է, թէ ատրպէյճանցի զինծառայողները ետ պիտի քաշուին:

«Վերջնական, երբ որ կը լինի ե՛ւ ժամկէտի առումով, ե՛ւ կատարման՝ բուն տեխնիկական հարցերով, լրացուցիչ կ’ասուի», – ըսաւ Դաւթեան։

Ճշդող հարցին, թէ ատրպէյճանական կողմէն համաձայնութիւն կա՞յ, «քանի որ դուք վստահ ասում էք, որ լինելու է այդպէս», Հայաստանի զինուած ուժերու գլխաւոր շտաբի պետը պատասխանեց․ – «Մենք մեր տարածքում Ատրպէյճանին հարցնելու ոչինչ չունենք, որպէսզի հարցնենք, բայց բանակցութիւններն ընթանում են ռուսական կողմի հետ, որովհետեւ կան հարցեր, մեր նպատակը, որ կայ, առանց բախումների մեր տարածքում յայտնուած ատրպէյճանական ստորաբաժանումների յետքաշումն է»։

Անվտանգութեան խորհուրդի քարտուղար՝ Արմէն Գրիգորեան «Ազատութիւն»ի հետ զրոյցին այսօր ըսաւ, որ բանակցութիւնները կ’ընթանան Գեղարքունիքի Սոթքէն մինչեւ Սիւնիքի Խոզնավար հատուածի շուրջ։

«Բանակցութիւններ են ընթանում հիմնականում այդ հատուածներում խնդիրը կարգաւորելու համար, բայց խնդիրը կարգաւորելուց յետոյ երեւի նման անհրաժեշտութիւն նոյնիսկ չի լինի: Այսինքն՝ երբ որ սահմանազատում, սահմանագծումը տեղի ունենայ, ապա այդտեղ արդէն կը տեղակայուեն, բնականաբար, Հայաստանի եւ Ատրպէյճանի սահմանապահները», – նշեց Գրիգորեան:

Հայ-ատրպէյճանական սահմանի Գեղարքունիքի հատուածը ռուս սահմանապահներու տեղակայման մասին երէկ Գեղարքունիք մարզպետը յայտնած էր։ Գնել Սանոսեան վստահեցուցած էր, թէ ռուս սահմանապահները մօտ ատենէն պիտի տեղակայուին։

Հարակից Նյութեր

Leave a Comment