«Արցախի տարածքների մի մասի զաւթումը չի կարող համարուել հակամարտութեան կարգաւորում», այսօր՝ Փետրուար 23-ին, Տարածաշրջանային եւ եւրասիական համարկման հարցերու մշտական յանձնաժողովի անդամներու հետ հանդիպման սկիզբին յայտարարեց Արտաքին գործոց նախարար՝ Արա Այվազեան:
Նախարարը նաեւ նշեց, որ 44-օրեայ պատերազմէն յետոյ Հարաւային Կովկասի մէջ տեղի կ’ունեայ խոշոր դերակատարներու վերադասաւորում:
«Ատրպէյճանի կողմից Արցախի դէմ ուժի կիրառման հետեւանքները եւ Արցախի տարածքների մի մասի զաւթումը չեն կարող համարուել հակամարտութեան կարգաւորում: Միայն քաղաքական բանակցուած կարգաւորումը, որը կը յարգի բոլորի իրաւունքները եւ կ’որոշի Արցախի վերջնական կարգավիճակը, կարող է համարուել հակամարտութեան վերջակէտը: Մենք յանձնառու ենք կարգաւորման գործընթացի վերսկսմանը, սակայն նախ եւ առաջ, պէտք է ձեւաւորուի խաղաղութեան նպաստող միջավայր, իսկ դրա նախադրեալները ատրպէյճանական կողմից դեռեւս նկատելի չեն», – նշեց Այվազեան:
Նախարարի ելոյթէն յետոյ նիստը շարունակուեցաւ փակ ձեւաչափով: Նիստի աւարտին, լրագրողներու հետ զրոյցի ընթացքին, արտաքին քաղաքական գերատեսչութեան ղեկավարը, որ այս պաշտօնին նշանակուած է 44-օրեայ պատերազմէն յետոյ, հերքեց իր հրաժարականի մասին լուրերը, փոխարէնը վստահեցուց, որ 24-ժամեայ ռեժիմով զբաղած են Ատրպէյճան գտնուող հայ գերիներու վերադարձի հարցով: Ըստ Նախարարին, միջազգային հանրութեան ճնշումը Ատրպէյճանի նկատմամբ մեծցած է:
«Գնալով միջազգային ճնշումը հետզհետէ աճում է, եւ ինչպէս ենթադրում էի, գերիների հայրենադարձութեան արհեստական խոչընդոտներ ստեղծելու Ատրպէյճանի քաղաքականութիւնը, պատանդառութիւնը կամաց-կամաց դառնում է գլխացաւանք Ատրպէյճանի համար: Մենք լիայոյս ենք, որ Ատրպէյճանը կը հրաժարուի պատանդառութեան քաղաքականութիւնից եւ անյապաղ դրական լուծում կու տայ մարդասիրական այս կարեւորագոյն հարցին», – ընդգծեց Արա Այվազեան:
Զուգահեռ, սակայն, եղանակային պայմաններու վատթարացում հիմնաւորմամբ դադրեցուած են դիերու որոնողական աշխատանքները՝ հայկական կողմի վերահսկողութենէն դուրս գտնուող տարածքներէն ներս:
Այվազեան պնդեց, որ խնդիրը իսկապէս եղանակային պայմաններն են, եւ առաջիկային որոնման աշխատանքները կը շարունակուին: Այս հարցերով Հայաստանին կ’աջակցին նաեւ գործընկեր պետութիւնները: Այսօր լրագրողներու հետ զրոյցի ընթացքին գերիներու վերադարձի թեմային անդրադարձած է նաեւ Հայաստանի մօտ Ռուսաստանի Դաշնութեան դեսպան՝ Սերկէյ Քոփիրքին:
«Գերիներու հետ կապուած աշխատանք տեւական կը տարուի, ներառեալ՝ Ռուսաստանի բարձրագոյն ղեկավարութեան կողմէ: Ինչպէս գիտէք, պարբերաբար նոր խումբերու վերադարձի մասին տեղեկութիւն կը ստանանք: Ի հարկէ, կը ցանկայինք, որ ամէն ինչ աւելի արագ ըլլար եւ բոլորը բոլորի դիմաց սկզբունքին համապատասխան, բայց աշխատանքը հեշտ չէ եւ յամառօրէն կը շարունակուի», – նշած է Սերկէյ Քոփիրքին:
Ռուսաստանի դեսպանի կարծիքով՝ տուեալ փուլին, Հայաստանի ղեկավարութեան հետ շփումը բաւականաչափ սերտ է եւ ուժգին, աւելին՝ վերջինս եւս հաստատեց, որ Ռուսաստանը Հայաստանին կ’օգնէ բանակը բարեփոխելու հարցով: Դեսպանը չցանկացաւ մեկնաբանել աւելի վաղ Հայաստանի պաշտպանութեան նախարար՝ Վաղարշակ Յարութիւնեանի այն յայտարարութիւնը, թէ չի բացառուիր, որ ռուսական 102-րդ ռազմակայանի կազմէն որեւէ զինուորական կազմաւորում տեղափոխուի Հայաստանի արեւելք։ Այս թեմային այսօր չանդրադարձաւ նաեւ Հայաստանի արտաքին գործոց նախարարը։