«Ատրպէյճանի նախագահը նորանշանակ խորհրդարանի բացման նիստին հանդէս է եկել ընդարձակ ելոյթով, որում հերթական անգամ տեղ են գտել Հայաստանի եւ հայ ժողովրդի հանդէպ ատելութեան խօսքի յստակ դրսեւորումներ», – յայտարարած է Հայաստանի արտաքին գործոց նախարարութեան մամուլի քարտուղարը:
«Վերջին խորհրդարանական ընտրութիւնների արդիւնքների օրինականութեան ցածր մակարդակը, քաղաքական եւ ժողովրդավարական բարեփոխումներ կատարելու անկարողութիւնը Ատրպէյճանի իշխանութիւնները փորձում են քօղարկել թշնամական, անհիմն եւ մտացածին պնդումներով, որոնք Հայաստանից եւ հայ ժողովրդից բացի ուղղուում են նաեւ եւրոպական երկրներին, եւրոպական կառոյցներին, Ատրպէյճանում ընտրութիւնները դիտարկած միջազգային դիտորդական առաքելութեանը», – ըսած է Աննա Նաղտալեանի յայտարարութիւնը, զոր հրապարակած է Արտաքին գործոց նախարարութեան լրատուութեան եւ հանրային դիւանագիտութեան վարչութիւնը:
Յատկապէս մտահոգիչ է, ըստ Նաղտալեանի, որ «Ատրպէյճանի ղեկավարութիւնը փորձում է իր անհիմն մեղադրանքներում խաղարկել կրօնական քարտը՝ մի կողմից եւրոպական երկրներին մեղադրելով կրօնական հողի վրայ փախստականների իրաւունքների խախտումների մէջ, իսկ միւս կողմից՝ կրօնական համերաշխութեան կոչեր անելով (ԼՂ) Լեռնային Ղարաբաղ հակամարտութեան համաթեքսթում»:
«Ատրպէյճանի նախագահի կողմից պատմական եւ աշխարհագրական նոր «յայտնագործութիւններով» ուղեկցուող հայ ժողովրդի հանդէպ թշնամանքի քարոզը արմատապէս հակասում է վերջին շրջանում խաղաղութեան համար բարենպաստ միջավայր ձեւաւորելու եւ ժողովուրդներին խաղաղութեան նախապատրաստելու Ատրպէյճանի յանձնառութիւններին:
Այս տեսակէտից պէտք է փաստել, որ Ատրպէյճանում ժողովրդավարութեան եւ մարդու իրաւունքների առկայ խիստ ցածր չափանիշները լրջօրէն խոչընդոտում են ԼՂ խաղաղ գործընթացի առաջ մղմանը, մասնաւորապէս այդ գործընթացի շրջանակներում ձեռք բերուած պայմանաւորուածութիւնների իրականացմանը:
Սեփական օրինականութիւնը հարեւան ժողովրդի հանդէպ ատելութեան եւ միջազգային համայնքի հանդէպ անվստահութեան վրայ կառուցելու Ատրպէյճանի բարձրագոյն ղեկավարութեան փորձերն անպատասխանատու են եւ կարող են վտանգել տարածաշրջանի խաղաղութիւնը եւ անվտանգութիւնը», – կը շեշտէ Հայաստանի արտաքին քաղաքական գերատեսչութեան խօսնակը:
