ՍԴՀԿ Արեւմտեան Ամերիկայի Վարիչ Մարմինը կ’ողջունէ Միացեալ Նահանգներու Ծերակոյտի պատմական որոշումը` Հայկական Ցեղասպանութեան բանաձեւի միաձայնութեամբ հաստատման առթիւ եւ Հայ ժողովուրդի անունով շնորհակալութիւն կը յայտնէ ծերակուտականներ` Ռապըրթ Մենենտեզին եւ Դէտ Քրուզին, ինչպէս նաեւ Ծերակոյտի բոլոր անդամներուն, որոնք մերժելով վարչակազմի ճնշումները, կանգնեցան արդարութեան կողքին:
Հայկական Ցեղասպանութեան ճանաչումը եւ թրքական ժխտողականութեան մերժումը կարեւոր էր, ոչ միայն Հայութեան համար, այլեւ Միացեալ Նահանգներուն` որ կը դաւանի ըլլալ արդարութեան եւ մարդկային իրաւունքներու պաշտպանութեան ջատագով ամէնուրեք:
Ծերակոյտը իր այս որոշումով եկաւ միանալու Ներկայացուցիչներու Տան նախապէս առած քայլին, առաւել պարտաւորեցնելով Միացեալ Նահանգներու նախագահին, որ այսուհետեւ պաշտօնական յայտարարութիւններուն մէջ օգտագործէ «Հայկական Ցեղասպանութիւն» եզրը:
Գոնկրէսի որոշումներուն լոյսին տակ, վերատեսութեան պէտք է ենթարկուին նաեւ` Ցեղասպանութեան պաշտօնական ճանաչման բացակայութեան պատճառաբանութեամբ, Ամերիկեան դատարաններուն կողմէ նախապէս մերժումի արժանացած դատական այն գործերը, որոնք ներկայացուած էին զոհերու իրաւայաջորդներուն կողմէ:
Անգամ մը եւս կը պահանջենք, որպէսզի Թրքական պետութիւնը առերեսուի իր պատմութեան սեւ էջերուն հետ, ընդունի Հայոց Ցեղասպանութիւնը եւ արդար հատուցում կատարէ Հայութեան:
Այս առթիւ կու գանք արձանագրելու որ, Գոնկրէսէն ներս ձեռք ձգուած վերջին յաջողութիւնները կը պարտինք Ամերիկահայութեան հետեւողական ու հաւաքական ջանքերուն:
Սոցիալ Դեմոկրատ Հնչակեան Կուսակցութեան
Արեւմտեան Ամերիկայի Վարիչ Մարմին
Դեկտեմբեր 13, 2019