Ամերիկայի նորընտիր նախագահ` Տանոլտ Թրամփ այս օրերուն զբաղած է նոր վարչակարգի իր անձնակազմը ամբողջացնելու աշխատանքով:
Թրամփի առաջին նշանակումներէն մին հանդիսացաւ Ազգային Ապահովութեան գծով խորհրդականի պաշտօնին վրայ Մայքըլ Ֆլիննի նշանակումը:
Անցեալ Նոյեմբեր 8-ին, այն պահուն երբ Ամերիկացի ժողովուրդը կ’ուղղուէր քուէատուփ, ընտրելու համար իր նոր նախագահը, Գոնկրէսի հարցերուն նուիրուած «The Hill» թերթի կայքէջին վրայ լոյս տեսաւ Մայքըլ Ֆլիննի յօդուածը, ի պաշտպանութիւն Թուրքիոյ ու անոր նախագահ Ռաճէփ Էրտողանին:
Յօդուածագիրը նախ կը մեղադրէր Ամերիկեան մամուլը, որ շատ անարդար ու խիստ կը գտնուի յուլիսեան զինուորական յեղաշրջումի ձախող փորձէն ետք, Էրտողանի վարած ներքին քաղաքականութեան նկատմամբ: Ապա, շարունակելով ան կը գրէ,- «Մենք պէտք է սկսինք անդրադառնալ, որ Թուրքիան խիստ կարեւոր է Միացեալ Նահանգներու շահերու տեսանկիւնէն: Մենք պէտք է վերատեսութեան ենթարկենք մեր արտաքին քաղաքականութիւնը եւ ընդունինք Թուրքիան որպէս նախապայման: ՄԵՆՔ ՊԷՏՔ Է ԱՇԽԱՐՀԻՆ ՆԱՅԻՆՔ ԹՈՒՐՔԻՈՅ ՏԵՍԱՆԿԻՒՆԷՆ»:
Հայութեան համար խիստ մտահոգիչ այս տողերը աննկատ պիտի մնային, եթէ նախագահական ընտրութեան արդիւնքը տարբեր ըլլար: Սակայն, այժմ որ Ազգային Ապահովութեան խորհրդականին կը պատկանին այս տեսակէտները, անոնք կ’ստանան շատ աւելի մեծ կարեւորութիւն:
Ինչպէս ծանօթ է, Տանոլտ Թրամփ չունի արտաքին քաղաքական փորձառութիւն եւ ամբողջութեամբ պիտի ապաւինի իր Ազգային Ապահովութեան խորհրդականին վրայ: Մայքըլ Ֆլինն այսուհետեւ մնայուն ներկայութիւն պիտի դառնայ ոչ միայն Սպիտակ Տունէն ներս, այլ նաեւ նախագահի գրասենեակէն ներս, ձեւաւորելու համար Ամերիկայի արտաքին քաղաքականութիւնը` աշխարհի տաք կէտերուն, ներառեալ Լեռնային Ղարաբաղի հարցին, վերաբերեալ:
Մայքըլ Ֆլիննի պաշտպանած տեսակէտները ու նաեւ այն հանգամանքը, որ իրեն պատկանող ընկերութիւնը լոպիիսթական աշխատանքներ կը տանի ի նպաստ Թուրքիոյ, ոչ միայն շահերու խիստ բախում կը յառաջացնէ զուտ ամերիկեան առումով, այլ նաեւ զգուշ հետեւելու պարտաւորութեան տակ կը դնէ մեզ` Հայաստանէն սկսեալ մինչեւ Ամերիկահայութիւնը:
«ՄԱՍԻՍ»