Արարատ Միրզոյեանը նշանակուեցաւ Հայաստանի արտաքին գործոց նախարար: Նախագահ՝ Արմէն Սարգսեան ստորագրած է հրամանագիրը այսօր՝ հիմք ընդունելով վարչապետ՝ Նիկոլ Փաշինեանի առաջարկութիւնը:
Արարատ Միրզոյեանը 42 տարեկան է, նախորդ` 7-րդ գումարման Ազգային ժողովի նախագահն էր, մինչ այդ՝ Հայաստանի առաջին փոխվարչապետը, 2018 թուականի թաւշեայ յեղափոխութենէն առաջ՝ խորհրդարանի «Ելք» ընդդիմադիր խմբակցութեան պատգամաւոր: «Քաղաքացիական պայմանագիր» կուսակցութեան հիմնադիր անդամ է, 2016 թուականէն մինչ օրս կուսակցութեան վարչութեան մէջ է: Պատմական գիտութիւններու թեկնածու է, Երեւանի Պետական համալսարանի պատմութեան ֆակուլտետէն բացի աւարտած է նաեւ Պետական կառավարման ակադեմիան, ՀՀ ԳԱԱ Հայոց ցեղասպանութեան թանգարան հիմնարկի յետ աւարտականը:
Հայաստանի արտաքին գործոց նախարարի պաշտօնը թափուր էր Մայիսի վերջէն, երբ Արա Այվազեան հրաժարական ներկայացուց:
Մինչ օրս արտաքին քաղաքական գերատեսչութեան ղեկավարի պարտականութիւնները կը կատարէր Յուլիսի կէսերուն նախարարի առաջին տեղակալ նշանակուած Արմէն Գրիգորեան, որ ազատուած էր Անվտանգութեան խորհուրդի քարտուղարի պաշտօնէն:
Գրիգորեան այսօր վարչապետի ստորագրած որոշմամբ վերստին նշանակուեցաւ Անվտանգութեան խորհուրդի քարտուղար: