ՀՀ Պաշտպանութեան Նախարարութենէն յայտնած են, որ Ապրիլ 11-ին` ժամը 16:00-ի սահմաններուն, Ատրպէյճանի Զինուած Ուժերու ստորաբաժանումները կրակ բացած են Տեղ համայնքին ուղղութեամբ ճարտարապետական աշխատանքներ իրականացնող ՀՀ Զինուած Ուժերու զինուորներուն ուղղութեամբ: Հայկական կողմը դիմած է պատասխան գործողութիւններու: Ատրպէյճանը նաեւ ականանետեր կիրառած է հայկական դիրքերու ուղղութեամբ, իսկ հայկական կողմը դիմած է անհրաժեշտ պաշտպանական գործողութիւններու:
Հայկական լրատուամիջոցները կը յայտնեն, որ հայկական կողմը ունի 3, ատրպէյճանական կողմը` 4 զոհ:
Ատրպէյճանի զինուած ուժերը կրակած են նաեւ հայ-ատրպէյճանական սահմանի Սոթքի հատուածին մէջ տեղակայուած հայկական դիրքերու ուղղութեամբ, որուն հետեւանքով դադրեցուած են Սոթքի ոսկիի հանքավայրի աշխատանքները, աշխատակիցները տարհանուած են: Այս մասին «Արմենփրես»-ին յայտնած է Սոթքի ոսկիի հանքավայրը շահագործող «Կէոփրոմայնինկ» ընկերութեան ներկայացուցիչ Ռուզաննա Գրիգորեանը:
«Ժամը 17:15-ի սահմաններում սկսել են կրակել: Ընկերութիւնը դադարեցրել է Սոթքի հանքավայրի աշխատանքը եւ տարհանուել է աշխատակիցներին` նրանց անվտանգութեան ապահովման նկատառումներից ելնելով», ըսաւ Գրիգորեան:
«Ժամեր առաջ ատրպէյճանական զինուած ուժերի կողմից սադրիչ գործողութիւնների հետեւանքով այժմ Հայաստանի սահմաններին հանգիստ չէ: Ես ցանկանում եմ մեր զինուած ուժերին եւ զինուորներին զօրակցութեան խօսքեր ասել ԱԺ անունից, ուժ եւ կորով մաղթել նրանց մեր հայրենիքի սահմանների պաշտպանութեան հարցում», յայտնեց ԱԺ փոխնախագահ Յակոբ Արշակեանը:
Ան յոյս յայտնեց, որ մինչեւ յաջորդ օր սահմանային իրավիճակի որոշակի հանգուցալուծում կ’ըլլայ, եւ առաջարկեց բոլոր մնացած հարցերուն անդրադառնալ յաջորդ օրուան նիստին:
