Մոսկուան կ’ակնկալէ, որ Հաւաքական Անվտանգութեան Պայմանագրի Կազմակերպութեան (ՀԱՊԿ) միւս անդամներուն հետ Երեւանի փոխգործակցութեան բնոյթին վերաբերեալ «վնասակար քննարկումները» կը դադրին, եւ այդ առնչութեամբ ծագած հարցերը կառուցողական լուծում կը ստանան: Այս մասին յայտնած է Ռուսիոյ արտաքին գործերու փոխնախարար Միխայիլ Կալուզինը:
Անդրադառնալով վարչապետ Նիկոլ Փաշինեանի յայտարարութեան, որ ոչ թէ Հայաստանը դուրս կու գայ ՀԱՊԿ-էն, այլ գուցէ ՀԱՊԿ-ը կը լքէ Հայաստանը, Կալուզինը ըսած է․ «Յոյսով ենք, որ «ով ուրկէ կու գայ» թեմայով վնասակար քննարկումները կը դադրին, եւ ՀԱՊԿ շրջանակներուն մէջ Երեւանի հետ փոխգործակցութեան բոլոր հարցերը, այդ շարքին` կազմակերպութեան դիտորդական առաքելութեան` Հայաստանի տարածքին տեղակայումը, կը լուծուին կառուցողական ու փոխշահաւէտ ձեւով»:
Ռուսիոյ արտաքին գերատեսչութեան ղեկավարին տեղակալը վերահաստատած է դաշինքին պատրաստակամութիւնը` Հայաստանի անվտանգութեան ապահովման շահերէն ելլելով հայ-ատրպէյճանական սահմանին ՀԱՊԿ առաքելութիւն տեղակայելու, ինչպէս նաեւ ՀԱՊԿ Խորհուրդի նախագիծին մէջ ամրագրուած Հայաստանին աջակցելու ծրագիրը: «Մենք պատրաստ ենք այս աշխատանքին ճիշդ նոյն չափով, որքան ինքը Հայաստանը», ըսած է Կալուզինը «RTVI»-ին տուած հարցազրոյցին մէջ:
Երեւանը չէ ստորագրած աջակցութեան նախագիծը` զայն ուղարկելով լրամշակումներու: Հայաստանը ՀԱՊԿ-էն կ’ակնկալէ նախ գնահատական տալ Ատրպէյճանի կողմէ իր տարածքներու բռնագրաւման:
Ամիսներ շարունակ ՀԱՊԿ-ի հասցէին հնչող դժգոհութիւններէն յետոյ Հայաստանը Մարտի սկիզբը յայտարարեց, որ կը հրաժարի ռազմաքաղաքական դաշինքին մէջ գլխաւոր քարտուղարի տեղակալի իր բաժինէն: Աւելի ուշ, վարչապետ Նիկոլ Փաշինեան պարզաբանեց, որ Երեւանը հաճոյքով կը ստանձէ ՀԱՊԿ գլխաւոր քարտուղարի տեղակալի պաշտօնը, եթէ անով կը նշանակէ Հայաստանի Հանրապետութեան անվտանգութեան ապահովման եւս մէկ գործօն աւելցնել: «Եթէ դա այդ չի նշանակելու, մենք նման քայլ անելու իմաստ չենք տեսնում», ըսաւ Փաշինեան` միեւնոյն ժամանակ շեշտելով, որ ՀԱՊԿ-ը ուզելով, թէ չուզելով դուրս կու գայ Հայաստանէն եւ «այդ մեզ կ’անհանգստացնէ»: