Լրատուամիջոցներուն եւ ընկերային ցանցերուն մէջ Յունուար 24-ին տարածուեցան առանձնատուներու նկարներ, որոնք, ըստ պնդումներու, կը պատկանին պաշտպանութեան նախարար Սուրէն Պապիկեանին եւ արտաքին գործերու նախարար Արարատ Միրզոյեանին:
Ըստ օգտատէրերուն` նկարին մէջ ձախ կողմը պատկերուած առանձնատունը կը պատկանի Սուրէն Պապիկեանին, իսկ աջ հատուածի տունը` Արարատ Միրզոյեանին:
Հրապարկման տարածումէն յետոյ Պաշտպանութեան Նախարարութեան մամուլի խօսնակ Արամ Թորոսեանը հերքած էր Սուրէն Պապիկեանի կապը այդ առանձնատուներէն որեւէ մէկուն հետ:
Սիվիլնեթի փաստերու ստուգման խումբը` CivilNetCheck-ը, որոշեց Կադաստրի կոմիտէէն ձեռք բերել այս առանձնատուներուն կադաստրային գործերը` ստուգելու անոնց պատկանելութիւնը:
Նախ տեղորոշեցինք երկու առանձնատուները: Սուրէն Պապիկեանին վերագրուող առանձնատունը եւ կից հողամասը Երեւանի Աջափնեակ թաղամասի Նազարբեկեան թաղամաս 57/17 եւ 57/9 հասցէներով են:
Ինչպէս կը տեղեկանանք կադաստրային փաստաթուղթերէն, այս առանձնատան նախագծման աշխատանքները սկսած են 2016-էն: Առանձնատան սեփականատէրը, ըստ փաստաթուղթերուն, ծնունդով Լիբանանէն Գանատայի քաղաքացի Վաչէ Պետրոսի Մինասեանն է:
Ան այս հասցէներով գտնուող տարածքը ձեռք բերած է 2013-ին: Անոնց նկատմամբ Մինասեանի սեփականութեան իրաւունքը արձանագրուած է 2016-ին:
Կադաստրի տրամադրած փաստաթուղթերէն պարզ կը դառնայ, որ այս առանձնատան սեփականատէրերու կազմին մէջ փոփոխութիւն չէ եղած առնուազն 2016-էն, եւ այն մինչ օրս կը պատկանի Վահէ Պետրոսի Մինասեանին:
Արարատ Միրզոյեանին վերագրուող առանձնատունն ալ պարզուեցաւ, որ Կոտայքի մարզի Քասախ համայնքի Մուշ փողոցի թիւ 63-65 հասցէով է: Այս հասցէի կադաստրային փաստաթուղթերը կը փաստեն, որ առանձնատունը կը պատկանի Քաջարանի բնակիչ Արամ Աշոտի Մարգարեանին: Վերջինիս իրաւունքը այս հասցէներուն նկատմամբ արձանագրուած է 2018-ի Հոկտեմբերին: Տարածքին մէջ կառուցապատման աշխատանքներ սկսած են 2015-ին: Այս առանձնատունը վերջին տարիներուն չէ հանուած վաճառքի եւ, ըստ փաստաթուղթերուն, կը շարունակէ պատկանիլ Արամ Մարգարեանին:
