Ատրպէյճանի կողմէ Արցախը Հայաստանին եւ արտաքին աշխարհին կապող միակ ճանապարհի` Լաչինի միջանցքին փակումը կը շարունակէ մտահոգել Միացեալ Նահանգները:
Այս մասին ըսաւ ԱՄՆ Պետական Քարտուղարութեան խօսնակ Նետ Փրայսը` մեկնաբանելով Ատրպէյճանի գործողութիւնները, որոնք Արցախի մէջ յանգեցուցած են ծանր մարդասիրական հետեւանքներու:
«Մենք կը շարունակենք մտահոգուած մնալ Լաչինի միջանցքի հասանելիութեան խաթարման եւ ստեղծուած իրավիճակի մարդասիրական հետեւանքներուն առնչութեամբ: Սա կը խոչընդոտէ խաղաղութեան գործընթացը եւ կը խաթարէ միջազգային վստահութիւնը», նշեց Պետական Քարտուղարութեան խօսնակը:
Անդրադառնալով իրադրութեան հանգուցալուծման տարբերակներուն` Փրայս ըսաւ. «Մենք կոչ կ’ընենք լիարժէքօրէն վերականգնելու ազատ տեղաշարժը միջանցքով: Որեւէ հարցով յառաջընթացի միակ ճանապարհը բանակցութիւններն են»: