Արցախի Անվտանգութեան Խորհուրդի քարտուղարին գրասենեակը հաստատած է, որ ԱԽ քարտուղար Վիթալի Բալասանեանը Ռուսիոյ խաղաղապահ զօրակազմի եւ ատրպէյճանական կողմի ներկայացուցիչներուն հետ համատեղ այցելած է Բերձոր:
«Առաւօտ» օրաթերթի կայքէջին մէջ «Վիթալի Բալասանեանը Բերձոր է այցելել ատրպէյճանցի պաշտօնեաների եւ ռուս հրամանատարների հետ» վերտառութեամբ յօդուած հրապարակուած էր, որուն մէջ Բերձորի բնակիչ Սաթիկ Ասատրեանը յայտնած էր, որ Բալասանեանը Ատրպէյճանի պաշտօնեաներու եւ Ռուսիոյ խաղաղապահ զօրախումբի հրամանատարներուն հետ շրջած է Բերձորի մէջ: Տեղեկութիւնը նաեւ հաստատած էր Բերձորի քաղաքապետ Նարեկ Ալեքսանեանը:
Պատասխանելով «Արմենփրես» լրատուական գործակալութեան թղթակիցի գրաւոր հարցումին, թէ ո՞րն էր այցելութեան նպատակը եւ ի՞նչ հարցեր քննարկուած են, Արցախի Անվտանգութեան Խորհուրդի գրասենեակէն նշեցին.
«Անդրադառնալով Անվտանգութեան Խորհրդի քարտուղարի` քաղաք Բերձոր կատարած այցելութեանը, այն պայմանաւորուած է 2020 թուականի Նոյեմբերի 9-ի եռակողմ յայտարարութեամբ նախատեսուած` Արցախը Հայաստանին կապող նոր երթուղու շինարարութեան ընթացքին ծանօթանալու նպատակով եւ տեղի է ունեցել Արցախի Հանրապետութիւնում տեղակայուած ՌԴ խաղաղապահ զօրակազմի, ինչպէս նաեւ ադրբեջանական կողմի ներկայացուցիչների հետ համատեղ»:
Հարցումին, թէ արդեօք նմանատիպ այցելութիւններ եղա՞ծ են Աղաւնօ եւ Ներքին Սուս բնակավայրեր, Անվտանգութեան Խորհուրդի գրասենեակէն բացասական պատասխան տուած են:
«Արմենփրես»-ի թղթակիցը նաեւ հետաքրքրուած է, թէ ի՞նչ քայլեր կը ձեռնարկուին Աղաւնոյի, Բերձորի, Ներքին Սուսի բնակիչներուն պատշաճ եւ անվտանգ տարհանումը մինչեւ Օգոստոս 25 կազմակերպելու համար:
«Տեղեկացնում ենք, որ մնացեալ հարցերով կարող էք դիմել Արցախի Հանրապետութեան համապատասխան լիազօր մարմիններ», նշած են Արցախի ԱԽ գրասենեակէն: