Հայաստանի Ֆութպոլի ազգային հաւաքականի աւագ, իտալական «Ռոմա»ի կիսապաշտպան Հենրիխ Մխիթարեան կ’աւարտէ իր մասնակցութիւնը ընտրահաւաքականի կազմին մէջ:
«Այս եզրայանգմանն եմ եկել Նոյեմբերին Գերմանիայի դէմ կայացած իմ վերջին խաղից յետոյ: Կարծում եմ, որ ճիշդ ժամանակն է եւ, որ տուել եմ իմ հաւաքականին ամէնը` ինչ կարող էի», գրած է ան իր ֆէյսպուքեան էջով:
Մխիթարեան յաւելած է, որ յառաջիկայ տարիներուն ամբողջութեամբ կեդրոնացած պիտի ըլլայ ակումբային մրցումներու վրայ:
Նոյեմբերին Հայաստանի ֆութպոլի ազգային հաւաքականը 2022 թուականի աշխարհի ախոյեանութեան ընտրական մրցաշարքի վերջին` 10-րդ խաղին 1-4 արդիւնքով պարտութիւն կրած էր Գերմանիոյ հաւաքականէն եւ մրցաշարքը աւարտած էր «J» խումբի 4-րդ հորիզոնականին վրայ:
33-ամեայ ֆութպոլիստը Հայաստանի ազգային հաւաքականի լաւագոյն ռմբարկուն է, իսկ 2015 թուականէն` աւագը:
Ութ անգամ (եօթը անգամ անընդմէջ) դարձած է Հայաստանի լաւագոյն ֆութպոլիստ: Ան կը համարուի Հայաստանի ազգային հաւաքականի պատմութեան լաւագոյն ռմբարկուն` 88 խաղի մէջ նշանակած 30 կոլով:
