ՀՀ ԱԺ պատգամաւոր Նայիրա Զոհրապեանը գրառում կատարած է իր էջին վրայ, որուն մէջ անդրադարձած է «Նուպարաշէն» քրէակատարողական հիմնարկին մէջ պատիժ կրող ցմահ դատապարտեալ Արմենակ Մնջոյեանի առողջական վիճակին:
Ան, մասնաւորապէս, գրած է. ««Դրոյի» գործով 1996-ին մահապատժի դատապարտուած, իսկ 2003-ին մահապատիժը «մեծահոգաբար» ցմահ ազատազրկմամբ փոխարինուած Արմենակ Մնջոյեանը ծանր կաթուածով տեղափոխուել է Էրեբունի հիւանդանոց։
Ես հիմա չեմ ուզում քննարկել, թէ ինչու ժամանակին «իրավիճակի փոփոխութիւն» ձեւակերպմամբ նոյն գործով որոշ գործիչներ ազատ արձակուեցին, իսկ Արմենակ Մնջոյեանը, Արսէն Արծրունին՝ ոչ։ Ես ընդամէնը խնդրում եմ երկրի նախագահին ու վարչապետին ներում շնորհել Արմենակ Մնջոյեանին։
Քանի դեռ ուշ չէ։ Եւ քանի դեռ այդ քայլը անելու ժամանակ ունէք»։
Աւելի վաղ NEWS.am-ը յայտնած էր, որ 3 Յունուարի առաւօտեան կտրուկ վատացած է Նուպարաշէն քրէակատարողական հիմնարկին մէջ պատիժ կրող ցմահ դատապարտեալ Արմենակ Մնջոյեանի առողջական վիճակը. անոր տեղափոխած են քաղաքացիական հիւանդանոց: Մնջոյեանի դուստրը՝ Լաուրա Մնջոյեանը յայտնած է, որ հայրը սրտամկանի սուր կաթուած անցուցած է եւ այժմ կը գտնուի բժիշկներու հսկողութեան տակ:
