Անցած շաբաթ Ուաշինկթընի մէջ Թուրքիոյ դեսպանատան մօտ տեղի ունեցած գայթակղային ծեծկռտուքէն ետք կը շարունակուին թուրք-ամերիկեան փոխադարձ մեղադրանքներն ու լարուածութիւնը:
Անգարայի մէջ ԱՄՆ դեսպան Ճոն Պաասը նախօրէին կանչուած է Թուրքիոյ ԱԳ նախարարութիւն անցած շաբաթ նախագահ Թայիփ Էրտողանի` Ուաշինկթըն կատարած այցի ժամանակ Թուրքիոյ դեսպանատան մօտ տեղի ունեցած արիւնալի միջադէպի կապակցութեամբ:
Թուրքիոյ ԱԳՆ պաշտօնական կայքի հրապարակման համաձայն, թրքական արտաքին գերատեսչութիւնը գրաւոր եւ բանաւոր դժգոհութիւն յայտնած է դեսպան Պաասին «ԱՄՆ անվտանգութեան ծառայութեան անձնակազմի կողմէ նախարար Մեւլութ Չաւուշօղլուի թիկնապահներու նկատմամբ դրսեւորած դիւանագիտական կանոններուն հակասող, թշնամական պահուածքին վերաբերեալ»:
Թուրքիոյ ԱԳՆ-ն դեսպանին պահանջ ներկայացուցած է հետաքննել տեղի ունեցածը եւ հանդէս գալ համապատասխան յայտարարութեամբ:
«Ազգայնական շարժում» կուսակցութեան նախագահ Տեւլէթ Պահչելին իր հերթին աջակցութիւն յայտնած է Թուրքիոյ ԱԳՆ-ի՝ ԱՄՆ դեսպան Ճոն Պաասին ներկայացուած բողոքին` յայտարարելով, թէ սա թրքական պետութեան պատուի հարցն է:
Անցած շաբաթ նախագահ Էրտողանի ԱՄՆ այցելութեան ժամանակ Ամերիկայի հայկական, քրտական, յունական եւ ասորական համայնքներու ներկայացուցիչները բողոքի ցոյց կազմակերպած էին Թուրքիոյ դեսպանատան մօտ: Էրտողանի աջակիցները, այդ շարքին, ըստ ամերիկեան մամուլի, անոր թիկնազօրի անդամները յարձակած էին խաղաղ ցուցարարներուն վրայ եւ ծեծի ենթարկած անոնց: Բռնութիւններու հետեւանքով 11 մարդ տուժած էր, երկու հոգի ձերբակալուած էր իրավախախտումներ թոյլ տալու մեղադրանքով:
Թրքական ԱԳՆ-ի պնդմամբ` միջադէպը տեղի ունեցած է ամերիկեան համապատասխան մարմիններու կողմէ անվտանգութեան ապահովման համար անհրաժեշտ միջոցներ չձեռնարկելու հետեւանքով: Մինչդեռ ամերիկեան մամուլը կը գրէ, թէ Էրտողանի թիկնապահները յարձակած են ցուցարարներուն վրայ:
Միջադէպէն ետք ԱՄՆ պետքարտուղարութիւնը իր խիստ մտահոգութիւնը փոխանցած էր Թուրքիոյ կառավարութեան, իսկ ԱՄՆ ծերակուտականի պաշտպանութեան հարցերով յանձնաժողովի ղեկավար, հանրապետական ՄըքՔէյնը նոյնիսկ կոչ ըրած էր ետ ուղարկել Թուրքիոյ դեսպանին: