Հայաստանի պետական պիւտճէի եկամուտները այս տարուայ առաջին եռամսեակին նախորդ տարուայ նոյն ժամանակահատուածի համեմատ աճած են 7.9 տոկոսով կամ շուրջ 19.9 միլիառ դրամով, ինչը պայմանաւորուած է հարկային եկամուտներու եւ այլ եկամուտներու աճով:
ՀՀ ֆինանսներու նախարարութեան հրապարակած տուեալները կը վկայեն, որ պետական պիւտճէի եկամուտներու 94.5 տոկոսը ձեւաւորուած է՝ հարկային եկամուտներու եւ պետական տուրքերու, շուրջ 4.7 տոկոսը` այլ եկամուտներու, իսկ 0.8 տոկոսը` պաշտօնական դրամաշնորհներու հաշւոյն:
2017 թուականի առաջին եռամսեակին ՀՀ պետական պիւտճէ մուտքագրուած են 255.5 միլիառ դրամ հարկային եկամուտներ եւ պետական տուրքեր` 4.2%-ով գերազանցելով եռամսեակային ծրագիրը: 2016 թուականի նոյն ժամանակահատուածի համեմատ հարկերն ու տուրքերը աճած են 10.6%‑ով կամ շուրջ 24.5 միլիառ դրամով, որ հիմնական պայմանաւորուած է հարկի աւելցած արժէքի, բնապահպանական եւ բնօգտագործման վճարներու, եկամտային հարկի, մաքսային հարկի եւ մաքսատուրքի գծով մուտքերու աճով:
