Մայիս 9-ին, Լեռնային Ղարաբաղի մէջ տեղի ունեցան մայիսեան Եռատօնի` Պաշտպանութեան բանակի կազմաւորման, Շուշիի ազատագրման 25 ամեակի եւ Հայրենական մեծ պատերազմի յաղթանակի տօնակատարութիւնները:
Պաշտօնական այցով արդէն մի քանի օրէ Ստեփանակերտ գտնուող Հայաստանի նախագահ Սերժ Սարգսեանը` Լեռնային Ղարաբաղի ներկայ ու նախկին նախագահներ Բակօ Սահակեանի եւ Արկադի Ղուկասեանի հետ ներկայ եղաւ Ստեփանակերտի Վերածնունդի հրապարակին մէջ ռազմաթեխնիկայի ու սպառազինութեան ցուցահանդէսին, նոր սպառազինութեան շարքին նաեւ անօդաչու թռչող սարքերու ցուցադրութեան:
Նախագահները բարձրաստիճան պաշտօնեաներու եւ հիւրերու ուղեկցութեամբ այցելեցին նաեւ Ստեփանակերտի յուշահամալիր եւ յարգանքի տուրք մատուցեցին Հայրենական մեծ պատերազմի ընթացքին զոհուածներու ու արցախեան ազատամարտի նահատակներու յիշատակին:
Արարողութենէն ետք, նախագահները` քաղաքական, ռազմական ու հոգեւոր դասի բարձրաստիճան ներկայացուցիչներու հետ ուղեւորուեցան Լեռնային Ղարաբաղի հինաւուրց մայրաքաղաք Շուշի, ծաղիկներ դնելով Թանկ-յուշարձանին, այնուհետեւ Վազգէն Սարգսեանի արձանի մօտ յարգանքի տուրք մատուցուեցաւ անոր յիշատակին:
Ստեփանակերտի կեդրոնական փողոցներով պարբերաբար շարային քայլերթ կը կատարէին զինուորական ստորաբաժանումները: Ամէնուրէք փակցուած էին Հայաստանի եւ Լեռնային Ղարաբաղի դրօշներն ու շնորհաւորական պաստառները:
Տօնը ոչ միայն յոբելեանական էր, այլեւ բացառիկ էր իր մարդաշատութեամբ: Գրաւուած էին բոլոր հիւրանոցային համարները ու զբօսաշրջիկներէն շատեր չեն կրցած նոյնիսկ օրավարձով բնակարաններ գտնել:
Միջոցառումները եզրափակուեցան երեկոյեան Ստեփանակերտի հրապարակի վրայ կազմակերպուած տօնական համերգով ու հրավառութեամբ: