Անցեալ Շաբաթ օր երեկոյեան, Լոս Անճելըսի մէջ Ատրպէյճանի Հիւպատոսարանի նախաձեռնութեամբ, «Օրֆիում» թատերասրահէն ներս կազմակերպուած էր համերգ` «՚Ատրպէյճանի երաժշտութիւնը կը հանդիպի Լոս Անճելըսին» խորագիրին տակ:
Այս առթիւ, համերգին ներկայ եղող Ամերիկացիները լուսաբանելու նպատակով, ՍԴՀԿ Հայ Ամերիկեան Խորհուրդը կազմակերպած էր բողոքի ցոյց, որու ընթացքին, սրահի մուտքին ժողովուրդին բաժնուեցան թռուցիկներ, ուր բացատրուած էին Ատրպէյճանի բռնատիրական իշխանութիւններու վարքագիծը` ընդդիմախօսներու, ազատութիւններու, փոքրամասնութիւններու եւ հայութեան դէմ:
Թերթիկները կարդացողները զարմանք կը յայտնէին, որ տեղեակ չէին Ատրպէյճանի մէջ տիրող կացութեան մասին:
Այս առթիւ, ՀԱԽ-ի անդամներէն Գրիգոր Մոլոյեան յայտարարեց,- «Մենք հոս չենք եկած բողոքելու համար Ազերի մշակոյթին դէմ: Մենք հոս ենք բողոքելու` Ալիեւի ընտանիքի բռնատիրութեան դէմ, որու հետեւանքով քաղաքական բանտարկեալները կը պահուին անտեսելով անոնց մարդկային իրաւունքները, իսկ փոքրամասնութիւններու իրաւունքները կը ոտնակոխուին: Կը յուսանք որ, մեր ձայնը լսելի կը դառնայ Ատրպէյճանի հիւպատոսին եւ իր Ամերիկացի հիւրերը տեղեակ կը դառնան Ալիեւի ռեժիմի գործած ոճիրներու մասին»: