Home ԳԼԽԱՒՈՐ ԼՈՒՐԵՐ Մերքէլի Կուսակիցները Կոչ Կ’ընեն Արգիլել Էրտողանի Այցը Գերմանիա

Մերքէլի Կուսակիցները Կոչ Կ’ընեն Արգիլել Էրտողանի Այցը Գերմանիա

by MassisPost

«Ռեճեփ Էրտողանն ու անոր նախարարները անցանկալի անձեր են Գերմանիոյ մէջ, բաւ է արդէն»,- Մարտ 21-ին յայտարարած է Գերմանիոյ իշխող կուսակցութեան առաջնորդներէն մէկը՝ Քրիստոնեադեմոկրատական միութեան փոխնախագահ Ֆոլքէր Պուֆիէրը:

Վարչապետ Անկելա Մերքէլի բարձրաստիճան կուսակիցը կրկնած է՝ «Թուրքիոյ նախագահը անցած է թոյլատրելիի սահմանը, ֆաշիզմի եւ Գերմանիոյ կառավարութեան միջեւ որեւէ համեմատութիւն կտրականապէս անընդունելի է»:

«Անոնք ցանկալի անձ չեն մեր երկրի մէջ: Մէկը, որ կը վիրաւորէ Գերմանիոյ իշխանութիւններուն այդ ձեւով, պէտք չէ ակնկալէ, որ մենք հազարաւոր ոստիկաններ կը հաւաքենք անոր անվտանգութիւնը ապահովելու համար»,- ըսած է Ֆոքլէր:

Մերքէլի մէկ այլ կուսակից՝ Սաքսոնիա-Անհալթի վարչապետ Ռէինըր Հազըլոֆ աւելի հեռու գնացած է՝ կոչ ընելով պաշտօնապէս արգիլել Էրտողանի ու անոր աջակիցներու այցերը Գերմանիա: «Մենք կ’ողջունենք բոլորին անոնց, որոնք կու գան որպէս հիւր՝ որեւէ հարց քննարկելու, բայց ոչ՝ քարոզի, եւ սա յատկապէս կը վերաբերի այն մարդոց, որոնք վարկաբեկիչ յայտարարութիւններ կ’ընեն մեր երկրի հասցէին»,- Die Welt -ին ըսած է գերմանացի պաշտօնեան:

Եւրոմիութեան ընդարձակման հարցերով յանձնակատար Եոհանէս Հանն իր հերթին զգուշացուցած է, որ Անգարայի անդամակցութիւնը եւրոպական ընտանիքին հետզհետէ աւելի անիրատեսական կը դառնայ: «Թուրքիան ալ աւելի կը հեռանայ Եւրոմիութենէն եւ եթէ արագօրէն չփոխէ իր քաղաքականութիւնը, ԵՄ-ին անդամակցութիւնը կը դառնայ շատ ու շատ աւելի անհաւանական»,- BILD-ին ըսած է Եւրոմիութեան յանձնակատարը:

Թուրքիոյ նախագահի վրայ, սակայն, այս նախազգուշացումները կարծես երբեք չեն ազդած: Ելոյթ ունենալով Անգարայի մէջ՝ Էրտողան ոչ միայն կրկնած է զուգահեռները Արեւմուտքի ու ֆաշիզմի միջեւ, այլեւ այդ համեմատութիւնը դարձուցած է իր կարգախօսներէն մէկը՝ սահմանադրական քարոզարշաւին:

«Եւրոպացիները տմարդի են, ոչ խիղճ ունին, ոչ երախտագիտութիւն: Այսօրուայ Եւրոպան ֆաշիստ է, երկրորդ համաշխարհային պատերազմի դաժան Եւրոպան, միջնադարեան Եւրոպան, որ թշնամի կը համարէր թուրքերուն: Սահմանադրական փոփոխութիւններուն այո ըսելով՝ դուք ձեր պատասխանը կու տաք այդ Եւրոպային»,- յայտարարած է Էրտողան:

16 Ապրիլին նախատեսուած հանրաքուէէն ետք Թուրքիան արմատապէս պիտի փոխէ իր վերաբերմունքը Եւրոպայի հանդէպ, նաեւ սպառնացած է Էրտողան, շարունակելով․ «Մենք թոյլ չենք տար, որ մեզ հետ այսպէս վարուին: Թուրքիան հաշիւ պիտի պահանջէ Ռոթըրտամի մէջ ցոյցի ժամանակ վիրաւորուած մեր եղբօր՝ Հիւսէին Քուրթի համար: Եթէ դուք կը հարուածէք մեզ, մենք պատասխան կու տանք, ինչ ցանէք՝ այն կը հնձէք: Այսույետ եւրոպական երկրներու ոեւէ գործակալի թոյլ պիտի չտրուի աշխատիլ մեր երկիր: Մեզ այլեւս չէք կրնար վախցնել ոչ Եւրոմիութեան հետ բանակցութիւններու դադարեցմամբ, ոչ փախստականներու գործարքով, ոչ ալ որեւէ այլ հարցով: Վերջ, այդ փուլը այլեւս աւարտած է»:

Էրտողանի բորբոքուած այս ելոյթէն ետք անոր կուսակցութիւնը յայտարարած է, թէ կը չեղարկէ սահմանադրական հանրաքուէէն առաջ Գերմանիոյ մէջ նախատեսուած բոլոր հանդիպումները: Մայր օրէնքի այդ փոփոխութիւնները քուէարկութեան պիտի դրուին 16 ապրիլին: Փորձագէտներն ու ընդդիմախօսները վստահ են՝ անոնց նպատակն է ամրապնդել ու երկարաձգել բռնապետական կառավարմամբ յայտնի էրտողանի իշխանավարումը:

Հարակից Նյութեր

Leave a Comment