Հայաստանը պիտի չառարկէ, եթէ Ռուսաստանը որոշէ դուրս բերել Հայաստանի տարածքին տեղակայուած 102-րդ ռազմախարիսխը: Կառավարութեան ճեպազրոյցի ժամանակ այս մասին յայտարարած է վարչապետ Նիկոլ Փաշինեան՝ միաժամանակ ընդգծելով, որ այս թեման մինչ այժմ պաշտօնական քննարկման առարկայ չէ դարձած։
«Նման քննարկում չի եղել եւ մենք այս ընթացքում ոչ մի անգամ Հայաստանում տեղակայուած ռուսական 102-րդ ռազմախարիսխի հարցը չենք բարձրացրել… եթէ Ռուսաստանը որոշի դուրս բերել ռազմախարիսխ Հայաստանի Հանրապետութիւնից, մենք չենք առարկի, բայց եթէ ցանկութիւն արտայայտեն մնալու, մենք պատրաստ ենք նաեւ դա քննարկել»,- նշած է վարչապետը։
Փաշինեանի խօսքով՝ Հայաստանը չի համարեր, թէ 102-րդ ռազմախարիսխի ներկայութիւնը Հայաստանի տարածքին կենսական անհրաժեշտութիւն է։
Անդրադառնալով երկկողմ յարաբերութիւններուն՝ Փաշինեան տեղեկացուցած է յառաջիկային Մոսկուա կատարելիք աշխատանքային այցի եւ հայ-ռուսական կապերու համապարփակ գոյքագրման անհրաժեշտութեան մասին՝ հասկնալու համար, թէ գործնականին մէջ որ ոլորտներուն մէջ երկու երկիրներուն դիրքորոշումները կը համընկնին կամ կը տարբերին։
Նոր աթոմակայանի կառուցման ծիրին մէջ Փաշինեան յիշեցուցած է, որ Սեպտեմբերին կը սպասուի «Ռոսատոմի» ղեկավար Ալեքսէյ Լիխաչովի այցը՝ հնարաւոր նախագիծերն ու առաջարկները ներկայացնելու նպատակով։ Վարչապետը շեշտած է, որ այս հարցը հայկական կողմի համար աշխարհաքաղաքական ընտրութիւն չէ, այլ կը բխի գին-որակ լաւագոյն յարաբերակցութեան ապահովման սկզբունքէն։
Սեպտեմբեր 1-ին ՌԴ նախագահ Վլատիմիր Փութին Պիշքեքի մէջ ասուլիսի ժամանակ յայտնած էր. «Եթէ Հայաստանը կը համարէ, որ ռուսաստանեան ռազմախարիսխը իրեն պէտք չէ, մենք վաղը կը հեռանանք։ Հայաստանը պատրաս՞տ է անոր։ Խնդրեմ, մենք ոչ մէկուն ոչինչ կը պարտադրենք»։
Հայաստանի տարածքին տեղակայուած ռուսական 102-րդ ռազմական խարիսխը կը գործէ միջպետական պայմանագրերու հիման վրայ եւ նախատեսուած է Հայաստանի արտաքին անվտանգային սպառնալիքները զսպելու համար։
