Հայաստանէն որոշ պարէնային ապրանքներու մատակարարումներուն նկատմամբ ռոսսելխոզնադզօրի սահմանափակումները պայմանաւորուած են ոչ թէ քաղաքականութեամբ, այլ յայտնաբերուած խախտումներով։ «Ռոսիյսկայա Գազետա» թերթին այս մասին ըսած է գերատեսչութեան ղեկավար Սերկէյ Տանքվերթը։
«Տուեալ պարագային խօսքը բոլորովին այլ բանի մասին է»,- ըսած է Տանքվերթ։
Անոր խօսքով՝ Հայաստանի խնդիրը արտադրութեան եւ վերահսկողութեան կազմակերպումն է։ Մասնաւորապէս, Տանքվերլ մատնանշած է այն հանգամանքը, որ այնտեղ կ’աշխատին մեծ թիւով մանր ագարակապաններ, որոնք կ’աճեցնեն եւ կ’արտահանեն իրենց արտադրանքը։
«Բայց արտադրութեան եւ առաքման միջեւ փաստացի բացակայ է ներքին վերահսկողութեան եւ համագործակցութեան համակարգը։ Հազարաւոր կապ խոտաբոյսեր կը հաւաքուին մէկ մեքենայի մէջ, որմէ յետոյ վերահսկող մարմինները պէտք է
ստուգեն արտադրանքի հսկայական ծաւալներ։ Ֆիզիքապէս այդ անհնար է»,- պարզաբանած է Ռոսսելխոզնադզօրի ղեկավարը։
Տանքվերթ ընդգծած է, որ արտադրանքի վերահսկողութիւնը պէտք է իրականացուի անմիջապէս արտադրութեան փուլին։ Ան յաւելած է, որ, այդ շարքին՝ համակարգի արդիւնաւէտ աշխատանքի համար, անհրաժեշտ է համագործակցութիւն, արտադրական վերահսկողութիւն, ինչպէս նաեւ արտադրողներու միաւորումներու պատասխանատուութիւն։
«Այդ կը պակսի այսօր։ Անոր համար ալ սահմանափակումներու պատճառները կը գտնուին արտադրանքի որակի եւ անվտանգութեան տիրոյթին, այլ ոչ թէ քաղաքականութեան մէջ»,- նշած է ան։
