Հայաստանի վարչապետ Նիկոլ Փաշինեան հարց բարձրացուցած է, թէ ի՞նչն է պատճառը, որ Հայաստանի երեք նախկին ղեկավարները՝ Լեւոն Տէր Պետրոսեանը, Ռոպերթ Քոչարեանը եւ Սերժ Սարգսեանը կեանքի չեն կոչած Լեռնային Ղարաբաղի հակամարտութեան՝ իրենց նկարագրած հոյակապ լուծումները։
Փաշինեան ներկայացուցած է իր տարբերակները, թէ ինչու այդ լուծումները կեանքի չեն կոչուած։
Նիկոլ Փաշինեան թեմային անդրադարձած է Ֆէյսպուքի իր էջով հրապարակած տեսանիւթով։
«Ինչո՞ւ ուրեմն Հայաստանի բոլոր երեք նախկին ղեկավարները չեն իրականացրել Ղարաբաղի հարցի՝ իրենց կողմից նկարագրուող հոյակապ լուծումները։ Սրա համար կարող է լինել երկու տարբերակ. առաջինը, որ նրանք ցուցաբերել են յանցաւոր անգործութիւն՝ գուցէ, ծառայելով ոչ թէ Հայաստանի. այլ օտար երկրների շահերին՝ մեզ զրկելով Ղարաբաղի հարցի հոյակապ լուծումից կամ լուծումներից։ Եւ երկրորդ տարբերակը, որ նրանց կողմից նկարագրուող այդ հոյակապ լուծումները պարզապէս մտավարժանքի վրայ հիմնուած քաղաքական խաբէութիւն են եւ դրանց իրագործումը երբեք էլ հնարաւոր չի եղել։ Ուրիշ տարբերակ պարզապէս չկայ»,- ըսած է Փաշինեան։
