Ամերիկայի Միացեալ Նահանգներու գոնկրէսի անդամներ Տարել Իսսան եւ Կաս Պիլիրագիսը ներկայացուցած են «Կովկասի մէջ լարուածութեան կանխարգելման եւ փոխգործակցութեան յառաջխաղացման մասին» օրինագիծը (Preventing Escalation and Advancing Caucasus Engagement Act – PEACE Act, H.R.5632), որ կը նախատեսէ պատժամիջոցներ կիրառել Ատրպէյճանի դէմ Հայաստանի հանդէպ նոր յարձակման պարագային:
Օրինագիծը աջակցութիւն կը յայտնէ Հայաստանի ինքնիշխանութեան, Փաշինեանի խաղաղութեան նախաձեռնութիւններուն եւ ռուսական ազդեցութիւնը հեռացնելու ջանքերուն:
Պատժամիջոցները կը ներառեն ատրպէյճանական պաշտօնեաներու հաշիւներու սառեցում, վիզաներու արգելք եւ ֆինանսական սահմանափակումներ այն օտարերկրեայ դրամատուներուն համար, որոնք գործարքներ կը կատարեն ատրպէյճանական քարիւղի առեւտուրը հեշտացնող ֆինանսական հաստատութիւններու հետ:
Օրինագիծը կը նախատեսէ բացառութիւններ մարդասիրական օգնութեան եւ հիմնական ապրանքներու համար եւ պիտի գործէ 7 տարի: Ընթացիկ կարգավիճակ օրինագիծը ներկայացուած է ԱՄՆ գոնկրէսի Ներկայացուցիչներու պալատին մէջ 2025 թուականի Սեպտեմբեր 30-ին եւ նոյն օրը ուղարկուած է երեք կոմիտէներու՝ Արտաքին յարաբերութիւններու, Արդարադատութեան եւ Ֆինանսական ծառայութիւններու:
Օրինագիծը կը գտնուի օրէնսդրական գործընթացի սկզբնական փուլին եւ դեռ չէ քննարկուած կամ քուէարկուած կոմիտէներուն մէջ: Այն պէտք է հաստատուի իւրաքանչիւր կոմիտէի կողմէ, ապա անցնի Ներկայացուցիչներու պալատի եւ Ծերակոյտի քուէարկութիւնները՝ նախքան նախագահի ստորագրութեան ներկայացուիլը:
