Ընթացիկ տարուայ առաջին չորս ամիսներուն Հայաստանի մէջ տնտեսական աշխուժութեան ցուցանիշը 4,4 տոկոսով գերազանցած է 2024 թուականի նոյն ժամանակահատուածի ցուցանիշը: Այս մասին նշուած է ՀՀ Վիճակագրական Կոմիտէին հրապարակած հերթական ամփոփագրին մէջ: Ապրիլին այն 4,3 տոկոսով գերազանցած է Մարտի ցուցանիշը, իսկ նախորդ տարուայ Ապրիլին համեմատ բարձր եղած է 5,4 տոկոսով: Արդիւնաբերական արտադրանքին ծաւալը Յունուար-Ապրիլ ամիսներուն 16,1 տոկոսով ցած եղած է նախորդ տարուայ նոյն ժամանակահատուածի ցուցանիշէն՝ կազմելով 812 միլիառ 255.8 միլիոն դրամ: Մարտի համեմատ Ապրիլին նուազած է 3,9, իսկ նախորդ տարուայ Ապրիլի համեմատ՝ 8,7 տոկոսով: Այս տարուայ Ապրիլին թողարկուած է 212 միլիառ 429.1 միլիոն դրամի արտադրանք:
