Հայաստանի Կեդրոնական Դրամատունը կը կանխատեսէ, որ 2024 թուականին տնտեսական աճը պիտի ըլլայ 5,6 տոկոս, իսկ գնաճը պիտի մօտենայ նպատակային թիրախին:
Կեդրոնական Դրամատան նախագահ Մարտին Գալստեանը այս մասին ըսաւ Ազգային Ժողովի մշտական յանձնաժողովներու համատեղ նիստին ընթացքին 2024 թուականի պետական պիւտճէի նախագիծի նախնական քննարկումներուն ժամանակ:
«Մենք կարծում ենք, որ այս տարուայ համար տնտեսական աճը կը լինի 7 տոկոսի շրջանակներում: Նախորդ տարի 12,6 տոկոս տնտեսական աճ ունենալուց յետոյ այս տարի կ’ունենանք, մեր գնահատականով, 7,2 տոկոս: Կարծում ենք, որ միւս տարի աճը որոշակիօրէն պէտք է նուազի՝ մօտենալով հաւանական աճի մակարդակին: Մեր գնահատականներով՝ այնուամենայնիւ, աճը հաւանականէն որոշակի բարձր կը լինի, քանի որ բաւականին մեծ ծախսեր են նախատեսուած: Բայց այս պահի դրութեամբ մեր կանխատեսումներով աճը 2024-ի համար լինելու է 5,6 տոկոս», ըսաւ Գալստեան:
Կեդրոնական Դրամատունը մտավախութիւն ունի, որ 2024-ին կառավարութիւնը ստիպուած պիտի ըլլայ իրականացնել աւելի մեծ թափով ընթացիկ ծախսեր, ընդհանուր ծախսերը կրնան թերակատարուիլ: «Եթէ ընդհանուր ծախսերը մատնանշած ծաւալով չարեցինք, սակայն շարունակեցինք մեծացնել ընթացիկ ծախսերը, ապա դա բերելու է պահանջարկով պայմանաւորուած տնտեսական աճի, որը հաւանականից կտրուելու է: Իսկ հաւանականից կտրուելու դէպքում, բնականաբար, ունենալու ենք գնաճ, որին Կեդրոնական Դրամատունը աւելցուկային պահանջարկի զսպման տեսանկիւնից արձագանգելու է: Արձագանգը լինելու է տոկոսադրոյքի բարձրացումը», ըսաւ ան:
Գալստեան յոյս յայտնեց, որ այդ սենարով չեն ընթանար: Այս պահին Հայաստանի մէջ կայ 0,1 տոկոս գնաճ: Կեդրոնական Դրամատունը կը կարծէ, որ յաջորդ տարի պիտի մօտենայ նպատակային թիրախին: Նպատակային թիրախը մօտաւորապէս 4 տոկոսն է:
