Ատրպէյճանի եւ Հայաստանի պատուիրակութիւնները Ուաշինկթընի մէջ կայացած բանակցութիւններու ընթացքին համաձայնեցուցած են հնարաւոր խաղաղութեան համաձայնագրի որոշ դրոյթներ: Այս մասին ճեպազրոյցին յայտարարած է ԱՄՆ Պետական Քարտուղարութեան մամուլի ծառայութեան ղեկավարի տեղակալ Վետանթ Փաթելը:
«Մեր կարծիքով` անցեալ շաբաթ տեղի ունեցած քննարկումները կառուցողական էին: Եւ մենք կը կարծենք, որ Հայաստանի եւ Ատրպէյճանի պատուիրակութիւնները զգալի յառաջընթաց արձանագրծ են բարդ խնդիրներու լուծման գործին մէջ: Ինչպէս գիտէք, երկու երկիրները սկզբունքօրէն համաձայնութեան եկած են որոշակի պայմաններու շուրջ, աւելի լաւ կը հասկնան միմեանց: Կը կարծենք, որ յաւելեալ բարի կամքի, ճկունութեան եւ փոխզիջումներու պարագային համաձայնագիրը հասանելիութեան սահմաններու մէջ է», ըսած է Փաթել:
Անոր խօսքով` Միացեալ Նահանգները կը ցուցաբերէ ամբողջ անհրաժեշտ աջակցութիւնը Ատրպէյճանին ու Հայաստանին: Առկայ տուեալներով, նշած է ան, կողմերը կը շարունակեն փոխգործակցութիւնը:
