Ռուսիոյ եւ Հայաստանի միջեւ տարաձայնութիւն յառաջացնելու անբարեացակամ երկիրներու որեւէ փորձ արդիւնք պիտի չունենայ, եւ երկու երկիրներու իրաւապահ գերատեսչութիւններուն համագործակցութիւնը պիտի զարգանայ, կը հաղորդէ Ռուսիոյ Ներքին Գործերու Նախարարութեան մամուլի կեդրոնը` յղում ընելով գերատեսչութեան ղեկավար Վլատիմիր Քոլոքոլցեւի խօսքերուն:
Քոլոքոլցեւը Մոսկուայի մէջ հանդիպած է Հայաստանի ներքին գործերու նախարար Վահէ Ղազարեանին:
«Վլատիմիր Քոլոքոլցեւը վստահութիւն յայտնած է, որ Ռուսիոյ եւ Հայաստանի միջեւ յարաբերութիւններուն մէջ տարաձայնութիւն յառաջացնելու անբարեացակամ երկիրներու բոլոր փորձերը պիտի մնան ապարդիւն, իսկ ներքին գործերու նախարարութիւններուն փոխգործակցութիւնը պիտի զարգանայ` ի շահ երկու պետութիւններու ժողովուրդներուն»,- կ’ըսուի հաղորդագրութեան մէջ:
Միաժամանակ, ռուսական գերատեսչութեան ղեկավարը իր գործընկերոջ ուշադրութիւնը հրաւիրած է «աշխարհակարգի բազմաբեւեռ համակարգի ձեւաւորման դժուարին պատմական ժամանակաշրջանին վրայ»:
««Հաւաքական Արեւմուտքի»` մեր երկրին դէմ ուղղուած հիպրիտային դիմակայութեան գործիքներէն մէկը յետխորհրդային տարածքի պետութիւններուն մէջ ռուսավախ տրամադրութիւններու արմատաւորումն է», նշած է մամուլի կեդրոնը:
Աւելին, Քոլոքոլցեւը նշած է ՀԱՊԿ ձեւաչափով հայ գործընկերներու հետ աշխոյժ փոխգործակցութիւնը:
