Ամիսներ առաջ Ռուսիայէն երեւան տեղափոխուած Եուրի Ալեքսէեւը Ազատութեան հրապարակին մէջ պահ մը իրեն Մոկսուա զգացած է, երբ բողոքի շարժումը չսկսած ոստիկանները սկսած են մասնակիցները բերման ենթարկել:
Մասնագիտութեամբ իրաւաբան Եւրին կ’ըսէ, որ ամէն ինչ եղած է օրէնքի սահմաններուն մէջ, նախապէս ինք իրազեկած է երեւանի քաղաքապատերանին, համաձայնեցուցած է բողոքի գործողութիւնը. «Ոստիկանութեան գործողութիւնը հակաօրինական էր, պարզ էր, որ նպատակ ունէին թոյլ չտալ մեզ բողոք իրականացնել»:
Եուրի Ալեքսէեւը տարիներ շարունակ հայրենիքի մէջ մասնակցած է ընդդիմութեան ցոյցերուն, բերման ենթարկուած է, բայց Հայաստանի պարագային անակնկալի եկած է: Կ’ըսէ, որ Հայաստանի ժողովրդավարութեան մասին անոր պատկերացումները երէկուընէ յետոյ փոխուած են. «Յանկարծ ոստիկանները եկան, ըսին` տեղեկութիւն ունին, որ ձեր բողոքի գործողութիւնը վիրաւորական բնոյթ ունի, պահանջեցին դադրեցնել ցոյցը: Ըսի` նման բան չկայ, յիմարութիւն է, որեւէ հիմք չունիք: Յետոյ մեզ բերման ենթարկեցին»:
Այդպէս ալ չկայացած բողոքէն յետոյ ոստիկանութիւնը 22 հոգի բերման ենթարկած էր` ոստիկանի օրինական պահանջը չկատարելու համար:
Խայտառակութիւն ու ամօթ. Քաղաքական հասարակութիւնը այսպէս կ’որակէ տեղի ունեցածը` համատեղ յայտարարութեամբ ոստիկանութենէն պահանջելով հրապարակային բացատրութիւն տալ այս ապօրինութեան համար:
Իրաւապաշտպան Արթուր Սաքունցը կը յիշեցնէ խաղաղ բողոքի շարժումներով իշխանութեան եկած բարձրաստիճան պաշտօնեաներու հաւաստիացումները, թէ Հայաստանը ժողովրդավարութեան պասթիոն է: Երէկուան միջադէպը, Սաքունցի համոզմամբ, մեծ ստուեր կը նետէ Հայաստանի վրայ. «Սա դատապարտելի արարք է: Եւ այստեղ խնդիրը ոչ միայն զուտ ոստիկանութեան գործողութիւնների ապօրինութեան մասին է խօսքը: Բացարձակ ապօրինութիւն, որովհետեւ հաւաքը իրազեկուած է եղել, հաւաքը բացառիկ խաղաղ է եղել: Այլ քաղաքական իշխանութեան ապօրինութիւնն է: Մի քաղաքական իշխանութեան, որը հանդէս է գալիս խաղաղութեան օրակարգով, եւ եթէ խաղաղութեան օրակարգի աջակիցն է, ապա նաեւ դէմ է յարձակման եւ դէմ է պատերազմական միջոցներով, ուժի կիրառման միջոցներով հարցերի լուծմանը, ապա, միւս կողմից, այդ նոյն պատերազմական միջոցների դէմ հանդէս եկողներին է դէմ»:
Ի դէպ, երէկ խաղաղ ցուցարարները բաժիններ տանելէ քանի մը ժամ առաջ Ռուսիոյ դեսպան Սերկէյ Քոփիրքինը այցելած էր Հայաստանի կառավարութեան Հանրային Կապերու եւ Տեղեկատուութեան Կենտրոն: Ըստ պաշտօնական հաղորդագրութեան, կողմերը կարեւորած էին համագործակցութիւնը յատկապէս երկկողմ յարաբերութիւններուն վերաբերող ապատեղեկատուութեան դէմ պայքարի հարցերուն մէջ: Այլ մանրամասներ չեն հաղորդուիր:
Ապրիլին ալ Հայաստանի ու Ռուսոյ ղեկավարները համատեղ յայտարարութեամբ մտահոգութիւն յայտնած էին «հակաիրաւական եւ վնասակար գործողութիւններու իրականացման, պետութիւններու ներքին գործերուն միջամտելու եւ անոնց ինքնիշխանութիւնը խաթարելու նպատակով ժամանակակից տեղեկատուահաղորդակցային արհեստագիտութիւններու օգտագործման համար»:
Արթուր Սաքունցը հայ-ռուսական այդ հանդիպումներն ու յայտարարութիւնները հաշուի առնելով` կը պնդէ, որ երէկ տեղի ունեցածը Քրեմլինի հրահանգով էր. «Հարց է յառաջանում` Հայաստանում ի վերջոյ իշխանութի՞ւնն է պատասխանատու իրավիճակի համար, թէ՞ արդէն բոլոր խնդիրների կարգաւորման լիազօրութիւնը յանձնուած է Քրեմլին: Եւ այդ դէպքում իշխանութիւնը ինչպէս է ինքը պատկերացնում իր հետագայ կառավարումը, եւ բացարձակապէս անողնաշար, անսկզբունքային եւ հակաժողովրդավարական այդ գործելակերպով ենթարկւում է ու տուրք է տալիս բռնապետական ռեժիմի ապօրինի պահանջներին»:
Երէկուան միջադէպին անդրադարձած է նաեւ Հայաստանի Մարդու իրաւունքներու պաշտպանը` տեղեկացնելով, որ պարզաբանումներ պահանջած է Ոստիկանութենէն աւելի քան երկու տասնեակ քաղաքացիներ բերման ենթարկելու եւ բողոքի գործողութիւնը թոյլ չտալու վերաբերեալ: Ոստիկանութենէն առայժմ հրապարակաւ չեն արձագանգած:
