Այս օրերուն Սկովտիոյ Կլասքօ քաղաքին մէջ տեղի կ’ունենայ Կլիմայի փոփոխութեան նուիրուած Միացեալ Ազգերու Կազմակերպութեան հովանաւորած միջազգային համաժողովը, որուն կը մասնակցին աշխարհի տարբեր երկիրներու ղեկավարներ եւ ներկայացուցիչներ:
2015 թուականի Դեկտեմբերին, 196 երկիրներ Ֆրանսայի մայրաքաղաք Փարիզի մէջ ստորագրեցին միջազգային առաջին պայմանագիրը` միացեալ ուժերով պայքարելու համար կլիմայի փոփոխութեան եւ երկրագունդի ջերմութիւնը 2 աստիճանէն վար իջեցնելու նպատակաւ: Այս ուղղութեամբ պայմանագիրը ստորագրող երկիրները խոստացան նուազեցնել թունաւոր նիւթերու արտացայտումը ու այդ ընելու համար ապաւինիլ ուժանիւթերու այլընտրանքային միջոցներուն եւ ելեքտրական հոսանք արտադրելու համար օգտագործել արեգակային կամ արեւային միջոցներ` փոխանակ ածուխի, որ կ’ապականէ մթնոլորտը ու կը վնասէ մարդու առողջութեան եւ կենսամակարդակին:
Մեծ թիւով գիտնականներ համակարծիք են, որ կլիմայի փոփոխութեան պատճառաւ ու երկրագունդի տաքացման հետեւանքով կլիման դարձած է աւելի անկանխատեսելի, որոտամրրիկները աւելի ուժեղ, ձմեռնային եղանակը աւելի ցուրտ, իսկ ամառները` աւելի տաք: Այս է պատճառը որ յաճախ ականատես կ’ըլլանք` տարբեր երկիրներու մէջ անտառային հսկայ հրդեհներու եւ մարդկային ու նիւթական վնասներու: Երաշտը դարձած է աւելի սաստիկ, իսկ կը բարձրանայ ովկիանոսներու մակարդակը` ծովեզերեայ հողերը անցնելով ջուրի տակ:
Ինչպէս ամէն հարցի մէջ, այս պարագային եւս կան կլիմայի փոփոխութիւնը ուրացողներ, որոնց կարծիքով ահազանգ հնչեցնողները չափազանցութիւններու կ’երթան:
Կլասքոյի մէջ նախագահ` Ճօ Պայտըն ներողութիւն խնդրեց իր նախորդի` Տոնալտ Թրամփի Փարիզի պայմանագիրէն դուըս գալու որոշումին համար եւ խոստացաւ, որ Միացեալ Նահանգները այս հարցով դարձեալ պիտի ստանձնէ առաջնորդողի իր դերը:
Կասկած չկայ որ, կլիմայի փոփոխութիւնը իրականութիւն է եւ իւրաքանչիւր երկիր եւ անհատ ունի իր կատարելիք դերը` կլիմայի փոփոխութեան պատճառաւ մարդկութեան սպառնացող վտանգին դէմ պայքարելու ուղղութեամբ, որպէսզի յառաջիկայ սերունդները եւս կարողանան ապրիլ այս գեղեցիկ ու հրաշալի երկրագունդին վրայ` վայելելով անոր բոլոր բարիքները:
«ՄԱՍԻՍ»