2019 թուականի Յունուարին Հայաստանի Հանրապետութեան մէջ արձանագրուած է 562 հազար 43 աշխատատեղ` 2018 թուականի 511 հազար 902 աշխատատեղի դիմաց, եւ աճը 2019 թուականի Յունուարին՝ 2018 թուականի Յունուարի նկատմամբ, կազմած է 50 հազար 141, ֆէյսպուքեան ուղիղ հեռարձակմամբ յայտարարած է վարչապետ Նիկոլ Փաշինեանը։
Անոր փոխանցմամբ, այսպիսով յեղափոխութենէն ետք Հայաստանի մէջ ստուերէն դուրս եկած է եւ կամ ստեղծուած է շուրջ 50 հազար աշխատատեղ։
Սա թիւ է, որ, ըստ վարչապետին, չի կրնար կասկածի տակ առնուիլ։
«Երբ այս թիւը ես հնչեցրեցի ԵԽԽՎ ամպիոնից, բազմաթիւ հրապարակային յայտարարութիւններ հնչեցին, որ կասկածի տակ էին առնում այդ թիւը։ Կարո՞ղ է այս թուերն իրական չլինեն, չի կարող լինել այդպիսի բան, որովհետեւ այս թուերը ձեւաւորուել են ձեռնարկութիւնների, ընկերութիւնների ներկայացրած հարկային հաշիւների հիման վրայ։ Այսինքն՝ եթէ ընկերութիւնն ինքը, ոչ թէ մենք ենք յայտարարագրել, գնացել յայտնաբերել էդ աշխատատեղերը, այլ մարդիկ իրենք հարկային հաշուետուութիւնների հետ ներկայացրել են աշխատատեղերի իրենց թիւը, եւ մենք ունեցել ենք այսպիսի պատկեր։ Սա նշանակում է, որ այս աշխատողների համար ընկերութիւնները, իրաւաբանական անձինք, անհատ ձեռներէցները հաշուետուութիւն են ներկայացնում, որովհետեւ այստեղ հաշուետուութիւն կայ, որ անհատ ձեռներէցների մօտ էլ են աշխատատեղեր գրանցուել, եւ իրենք, փաստօրէն, հարկային հաշուետուութիւններում ներկայացնում են այս աշխատատեղերը, ինչը նշանակում է, որ նրանք արդէն պաշտօնապէս արձանագրուած աշխատատեղեր են, եւ դրա համար սրանից բխող որոշակի հարկային պարտաւորութիւններ են կատարւում, եւ սա, ըստ էութեան, թիւ է, որը չի կարող որեւէ կերպ կասկածի տակ առնուել, եթէ անհրաժեշտութիւն լինի, մենք ըստ ընկերութիւնների կարող ենք իմանալ, թէ որ ընկերութիւնն ինչքան աշխատատեղերի աւելացում է տուել», – ըսած է Փաշինեանը։
Վարչապետը սա համարած է ոչ թէ Հայաստանի կառավարութեան յաջողութիւն, այլ գործարարներու, քաղաքացիներու, ընկերութիւններու գիտակցութեան բարձրացման հետեւանք։
«Ես հասկանում եմ նաեւ, որ սա այսպիսի քննարկումների տեղիք տուեց, որովհետեւ սա, ըստ էութեան, կարող է նոյնիսկ ֆանթասթիքայի ժանրից թուայ, բայց այս ֆանթասթիքան այսօր Հայաստանի Հանրապետութիւնում իրականութիւն է, եւ դա շատ լաւ է։ Սա ես ոչ թէ Հայաստանի կառավարութեան յաջողութիւնն եմ համարում, ես սա համարում եմ մեր գործարարների, մեր քաղաքացիների, մեր ընկերութիւնների գիտակցութեան բարձրացման հետեւանք, կամ իրավիճակի նկատմամբ վերաբերմունքի արդիւնք», – ընդգծած է Նիկոլ Փաշինեանը։
