Անցնող շաբաթավերջին աշխարհի ուշադրութիւնը սեւեռած էր Ֆրանսայի վրայ, ուր տեղի ունեցաւ նախագահական ընտրութիւններու երկրորդ փուլը: Իրար դէմ կը պայքարէին չափաւորական Էմմանուէլ Մագրոնը եւ ծայրայեղ ազգայնական կուսակցութեան առաջնորդ` Մարի Լէ Փանը: Ձայներու 66 տոկոսը ստանալով, 39 տարեկան Մագրոն դարձաւ Նափոլիոնէն ի վեր Ֆրանսայի ամենէն երիտասարդ ղեկավարը:
Մարի Լէ Փան իր ընտրարշաւը կառուցած էր գաղթականները երկիրէն արտաքսելու եւ Ֆրանսան Եւրոպական Միութենէն դուրս բերելու մեկուսացման ծրագիրներուն վրայ ու այս ուղղութեամբ կը տանէր այլատեաց քարոզչութիւն:
Յատկապէս Եւրոպայի տարածքին կար մտավախութիւն, որ Տոնալտ Թրամփի օրինակը կրնայ տարածուիլ ովկիանոսի միւս կողմը եւ պատճառ դառնալ եւրոպական միացեալ կառոյցներու քայքայման եւ ծայրայեղական գաղափարներու տարածման: Սակայն, Ֆրանսայի աւանդական կուսակցութիւնները` սոցիալիստներն ու պահպանողականները, ընտրութիւններու առաջին փուլին պարտութիւն կրելէ ու ընտրապայքարէն դուրս մնալէ ետք, ցուցաբերեցին բարձր գիտակցութիւն ու կոչ ըրին իրենց կողմնակիցներուն, քուէարկելու նորայայտ Մագրոնին, Լէ Փաններու առաջքը առնելու համար:
Էմմանուէլ Մագրոնի յաղթանակը եկաւ կասեցնելու ազգայնամոլական շարժումներու յառաջխաղացքը: Նախապէս նոյնը ըրած էին Հոլանտայի եւ Աւստրիոյ քուէարկողները, ետ մղելով ֆաշիստական գաղափարներով սնանող գործիչները: Սակայն, նկատի առնելով Ֆրանսայի կարեւոր դերակատարութիւնը եւրոպական ու միջազգային թատերաբեմերուն վրայ, Լէ Փենի յաղթանակը կրնար վտանգել ամբողջ ցամաքամասի կայունութիւնը:
Այս բոլորի կողքին, Էմմանուէլ Մագրոնի յաղթանակը կարեւոր էր նաեւ հայութեան համար: Նախընտրական շրջանին Մագրոն հանդէս եկաւ բազմաթիւ յայտարարութիւններով` Ցեղասպանութեան ճանաչման եւ Արցախի հարցի խաղաղ լուծման գծով ջանքեր գործադրելու ուղղութ-եամբ: Ան, Ապրիլ 24-ին Փարիզ մէջ ներկայ եղաւ Ցեղասպանութեան 102-ամեակի արարողութեան:
Ֆրանսայի ժողովուրդը դասեր քաղելով Ամերիկայի ընտրութիւններէ, յաջողեցաւ չիյնալ այն ծուղակին մէջ, ուր կը գտնուի այսօր Միացեալ Նահանգները` Թրամփի ընտրութեան հետեւանքով:
«ՄԱՍԻՍ»