Հայաստանի արտգործնախարար Էտուարտ Նալպանտեանը երէկ հանդիպեցաւ Գերմանիոյ արտաքին գործերու նախարար Ֆրանք-Վալտեր Շթայնմայերին:
Կողմերը անդրադարձան միջազգային եւ տարածաշրջանային հրատապ հարցերու: Քննարկուեցաւ իրավիճակը Մերձաւոր Արեւելքի, մասնաւորապէս՝ Սուրիոյ, մտքեր փոխանակուեցան փախստականներու հոսքի եւ անոնց համարկման հետ կապուած հարցերու շուրջ: Կողմերը քննարկեցին նաեւ Հայաստան-Եւրոպական միութիւն համագործակցութեան առնչուող հարցեր։
ԵԱՀԿ-ի մէջ գերմանական նախագահութեան բնագրին մէջ մտքեր փոխանակուած են կազմակերպութեան օրակարգային հարցերու, Համպուրկի նախարարական խորհուրդի նախապատրաստական աշխատանքներու շուրջ։
Լեռնային Ղարաբաղի հիմնախնդրի կարգաւորման գործընթացի բնագրին մէջ Էտուարտ Նալպանտեանը ԵԱՀԿ գործող նախագահ Ֆրանք-Վալտեր Շթայնմայերի ուշադրութեանը հրաւիրեց, որ Ատրպէյճանը կը հրաժարի կեանքի կոչել հիմնահարցի հանգուցալուծման գործընթացի առաջ մղման նպատակով համապատասխան պայմաններու ստեղծման ուղղուած` Վիեննայի եւ Սան-Փեթերպուրկի գագաթաժողովներուն ձեռք բերուած պայմանաւորուածութիւնները, աւելին` կը շարունակէ սրել իրավիճակը Ատրպէյճանի եւ Լեռնային Ղարաբաղի միջեւ շփման գիծին։
Զրուցակիցները համակարծիք էին, որ ղարաբաղեան հիմնախնդրի խաղաղ կարգաւորումը այլընտրանք չունի:
Արտգործնախարարութիւնը կը տեղեկացնէ նաեւ, որ Նալպանտեանը Ֆրիտրիք Էպըրթ հիմնադրամին մէջ այսօր հանդիպեցաւ Գերմանիոյ Բունդեսթագի անդամներու, առաջատար վերլուծաբաններու եւ քաղաքագէտներու հետ: Հանդիպման ներկայ էին Բունդեսթագի փոխնախագահ Էդելգարդ Բուլմանը:
Հայաստանի ԱԳՆ ղեկավարը, արժեւորելով Բունդեսթագի կողմէ Հայոց ցեղասպանութեան ճանաչման բանաձեւի ընդունումը, բարձր գնահատեց Գերմանիոյ օրէնսդիր մարմնի սկզբունքային դիրքորոշումը։
Հայաստանի արտաքին քաղաքական գերատեսչութեան ղեկավարը զրուցակիցներուն ներկայացուց ապրիլին Ատրպէյճանի կողմէ Ղարաբաղի դէմ սանձազերծուած լայնածաւալ ռազմական գործողութիւններու մանրամասները, անոնց կարգին՝ միջազգային մարդասիրական իրաւունքի աղաղակող ոտնահարումները, ատրպէյճանական յարձակումէն յետոյ Վիեննայի եւ Սան-Փեթերպուրկի մէջ կայացած գագաթնաժողովներու արդիւնքները, ղարաբաղեան հիմնախնդրի կարգաւորման գործընթացի առաջ մղման համար համապատասխան պայմաններու ստեղծման նպատակով Հայաստանի եւ ԵԱՀԿ Մինսկի խումբի համանախագահ երկիրներու ջանքերը:
«Նման հերթական սադրիչ դրսեւորումներից է մէկ շաբաթից Ատրպէյճանում նախատեսուած լայնածաւալ զօրավարժութիւնների անցկացումը, որոնցում, ըստ Պաքուի, ներգրաւուած են լինելու ատրպէյճանական գրեթէ ողջ զինուժը ու ռազմական տեխնիկան, ինչը սպառազինութիւնների վերահսկման միջազգային պարտաւորութիւնների կոպտագոյն խախտում է։ Սա է Ատրպէյճանի ղեկավարութեան արձագանքը ԵԱՀԿ Մինսկի խմբի համանախագահ երկրների՝ հիմնախնդրի բացառապէս խաղաղ կարգաւորմանն ուղղուած բանակցային գործընթացն առաջ մղելու կոչերին», – ըսաւ Նալպանտեանը։
