Հայաստանի տնտեսական աշխուժութիւնը, ըստ պաշտօնական վիճակագրութեան, այս տարուայ 9 ամիսներուն աւելցած է 7,6 տոկոսով՝ անցեալ տարուայ հաշուետու ժամանակահատուածի համեմատութեամբ։ Ընդ որում, այս տարուայ Սեպտեմբերին, անցեալ տարուայ Սեպտեմբերի համեմատ, տնտեսական աշխուժութեան ցուցանիշը աւելցած է 10,5 տոկոսով, իսկ այս տարուայ Օգոստոսի համեատ՝ 9,8 տոկոսով։ Այս տարուայ ինը ամիսներու համար արդիւնաբերական արտադրանքի ծաւալը կազմած է 2.055.912,9 դրամ։
Անցեալ տարուայ նոյն ժամանակահատուածին համեմատ, այն նուազած է 5,7 տոկոսով։ Նոյն՝ Յունուար-Սեպտեմբեր ամիսներու համար համախառն գիւղարտադրանքը կազմած է 686.552,8 միլիոն դրամ։ Անցեալ տարուայ նոյն ժամանակահատուածին համեմատ՝ աճը կազմած է 6 տոկոս։ Շինարարութեան ոլորտը անցեալ տարուայ ինը ամիսներուն համեմատ աճած է 20,7 տոկոսով՝ կազմելով 462.162 միլիոն դրամ։ Առեւտուրի պարագային, ցուցանիշը կազմած է 4.724.122,4 միլիոն դրամ։ Աճը անցեալ տարուայ առաջին ինը ամիսներու կտրուածքին համեմատ կազմած է 20,7 տոկոս։ Նշենք, որ համաձայն Եւրասիական զարգացման դրամատան տուեալներուն, Հայաստանի ՀՆԱ աճը այս տարի պիտի կազմէ 5,5 տոկոս։
Համաշխարհային դրամատան գնահատմամբ այն պիտի կազմէ 5,2 տոկոս, Արժոյթի միջազգային հիմնադրամին համաձայն՝ 5 տոկոս, Եւրոպական վերակառուցման եւ զարգացման դրամատան համաձայն՝ 5 տոկոս, Զարգացման Ասիական դրամատան տուեալներով՝ 6 տոկոս։ Fitch Ratings-ը կը կարծէ, որ այս տարի Հայաստանի տնտեսական աճը պիտի կազմէ 4,9 տոկոս, ՄԱԿ-ի կանխատեսմամբ՝ Հայաստանի ՀՆԱ աճը պիտի կազմէ 5,2 տոկոս։
