Հայաստանի միջոցով Ռուսիա արգիլուած ապրանքներ հասցնելու վերաբերեալ ամերիկեան նախազգուշացումներէն յետոյ հիմա ալ Եւրոմիութիւնը կը յայտարարէ` դէպի Ռուսիա արտահանման ծաւալներու զգալի աճը կասկածելի է:
«Առանձին համակարգերու բացերու շնորհիւ պատժամիջոցները շրջանցել ուզողները կրնան այդ ընել, առեւտուրի միջոցով պատժամիջոցները շրջանցելու որոշակի ձեւէր կան», նախօրէին յայտնած է Եւրոմիութեան տնտեսական հարցերով յանձնակատար Փաուլօ Ճենթիլոնին: Բարձրաստիճան պաշտօնեան մատնացոյց ըրած է ԵՄ պետութիւններէն շարք մը երկիրներ եւ այդ պետութիւններէն դէպի Ռուսիա արտահանման զգալի աճը: Ղազախիստանի եւ Ղրղզիստանի կողքին տուած է նաեւ Հայաստանի անունը:
Պաշտօնեան, սակայն, չէ յստակացուցած, թէ արգիլուած որ ապրանքներուն մասին է խօսքը:
«Ես ոեւէ մէկուն մատնացոյց չեմ ըներ, բայց պարզ է», ըսած է Եւրոմիութեան տնտեսական հարցերով յանձնակատարը: Պաշտօնեան ընդգծած է, որ այս հարցը Եւրոմիութեան մարտահրաւէրներէն մէկն է:
Ըստ Euronews-ի` ռուս-ուքրանական պատերազմի մեկնարկէն յետոյ` 2022-ին ԵՄ անդամ պետութիւններէն Հայաստան արտահանման ծաւալները շուրջ 1,9 միլիառ եւրօ կազմած են, այնինչ նախապատերազմական 2021-ին այս ցուցանիշը 860 միլիոն էր:
Միեւնոյն ժամանակ, պաշտօնական տուեալներով` անցեալ տարի Հայաստանէն Ռուսիա արտահանումը 2021-ի համեմատ աճած է գրեթէ 3 անգամ` գերազանցելով 4 միլիառ տոլարը: Օրինակ, եթէ 2021-ի առաջին վեց ամիսներուն Հայաստանէն Ռուսիա արտահանուած էր 745 հատ հեռախօս, մոտըմ, ապա 2022-ի նոյն ժամանակահատուածին թիւը հասած է 53 հազարի:
Վերջին ամիսներուն յաճախակի դարձած Արեւմուտքի զգուշացումներուն զուգահեռ, Հայաստանի իշխանութիւնները պարբերաբար կը յայտարեն, որ Երեւանը Մոսկուային չ’օգներ շրջանցելու պատժամիջոցները:
Պատժամիջոցները Հայաստանի կարմիր գիծն են, օրերս չեխական պարբերականներէն մէկուն տուած հարցազրոյցին մէջ ըսած էր վարչապետ Նիկոլ Փաշինեանը:
«Ուքրանիաայի իրադարձութիւններից յետոյ բեռնափոխադրումների լոկիսթիք շղթաները պատռուել են կամ չեն գործում: Շատ ապրանքներ, որոնք ուղղակիօրէն մատակարարւում էին Ռուսաստան, այժմ այնտեղ են գնում Հայաստանի, Ղազախստանի եւ այլ երկրների միջոցով», նշած է վարչապետը:
Փաշինեան նշած է, որ պատժամիջոցներու տակ գտնուող ապրանքներու մասով Երեւան կը փորձէ հնարաւորինս թափանցիկ ըլլալ ու շեշտել, որ Երեւանը այս հարցով կը համագործակցի բոլոր կողմերուն հետ: