Թուրքիոյ Բարձրագոյն Ընտրական Խորհուրդի նախագահ Ահմեթ Էներ յայտնած է, որ ըստ Կիրակի օր տեղի ունեցած նախագահական ընտրութիւններու արդիւնքներուն, գործող նախագահ Ռեճեպ Թայիպ Էրտողանը ստացած է քուէներուն 49,51 տոկոսը, անոր հիմնական մրցակից Քեմալ Քըլըչտարօղլուն` 44,88 տոկոսը:
Երրորդ տեղը Սինան Օղանն է` 5,17 տոկոս, եւ չորրորդ տեղն է քուէարկութենէն առաջ մրցապայքարէն դուրս եկած Մոհարրեմ Ինճէն, որուն օգտին 0,44 տոկոս տրուած է:
Թուրքիոյ մէջ նախագահական ընտրութիւններու առաջին փուլի վերջնական պաշտօնական արդիւնքները պիտի հրապարակուին Մայիս 19-ին:
«Այսպիսով, թեկնածուներէն ոչ մէկը ստացած է նախագահ ընտրուելու համար անհրաժեշտ թիւով քուէներ, ուստի ուժի մէջ կը մտնէ թիւ 6271 օրէնքի պահանջը, որով տեղի պիտի ունենայ ընտրութիւններուն երկրորդ փուլը: Այն տեղի պիտի ունենայ 2023 թուականի Մայիս 28-ին», ազդարարած է ընտրական կառոյցին ղեկավարը:
Թուրքիոյ նախագահի երրորդ թեկնածու Սինան Օղանը, որ ընտրութիւններուն ստացած է երեք թեկնածուներէն ամենաքիչ ձայները (5%-էն աւելի), արդէն խոստացած է ընտրութիւններու երկրորդ փուլին աջակցիլ Թուրքիոյ ընդդիմութեան առաջնորդ Քեմալ Քըլըչտարօղլուին:
Թուրքիոյ նախագահի պաշտօնին համար մրցարշաւէն դուրս եկած, սակայն, նախնական տուեալներով, 200 հազարէն աւելի ձայն ստացած Մուհարրեմ Ինճէն դեռ չէ որոշած, թէ որու պիտի սատարէ ընտրութիւններու հնարաւոր երկրորդ փուլին: Այս մասին «Ռիա Նովոսթի»-ին յայտնած է թեկնածուի շտաբէն աղբիւրը: