Երեւանի մէջ, Ապրիլ 20-ին, կայացած են Հայաստանի Հանրապետութեան, Իրանի Իսլամական Հանրապետութեան եւ Հնդկաստանի Հանրապետութեան Արտաքին գործերու նախարարութիւններուն միջեւ եռակողմ ձեւաչափով առաջին քաղաքական խորհրդակցութիւնները: Պատուիրակութիւնները գլխաւորած են Հայաստանի արտաքին գործերու նախարարի տեղակալ Մնացական Սաֆարեանը, Իրանի ԱԳՆ Հարաւային Ասիոյ գլխաւոր վարչութեան պետ Սեյետ Ռասուլ Մուսաուին եւ Հնդկաստանի ԱԳՆ տարածքային գլխաւոր վարչութեան պետ Ճիթենտեր Փալ Սինկհը:
Հանդիպման ընթացքին, մասնաւորապէս, քննարկուած են տնտեսական, տարածաշրջանային հաղորդակցային ուղիներուն առնչուող հարցեր, նախանշուած են մշակութային եւ միջմարդկային կապերու խորացման եւ տարբեր ոլորտներու մէջ եռակողմ համագործակցութեան հեռանկարները: Կողմերը պայմանաւորուած են շարունակել համագործակցութեան միտուած եռակողմ ձեւաչափով խորհրդակցութիւնները: