Վարչապետ Նիկոլ Փաշինեան հանդիպած է Հանրապետութեան նախագահ Վահագն Խաչատուրեանին: Իր խօսքին Վահագն Խաչատուրեան նշած է. «նախ շնորհակալութիւն այցի համար: Զգացուած եմ: Մենք առիթ ունենում ենք շատ շփուելու: Քիչ է լինում, որ այսպիսի պաշտօնական շփում ունենանք, բայց կարեւոր եմ համարում ե՛ւ անձամբ ինձ համար, ե՛ւ հասարակութեան, ժողովրդի համար: Մի հանգամանքի վրայ եմ ուշադրութիւն դարձրել` հանդիպման ժամանակ ի՞նչ պիտի քննարկենք, ինչի՞ մասին կարող ենք խօսել: Ուզում եմ արձանագրել մի կարեւոր հանգամանք, որ տնտեսական առումով կառավարութեան ձեռքբերումները շատ ակնառու են: Այստեղ Ձեր եւ կառավարութեան ներդրումը շատ մեծ է:
Ես անընդհատ հետեւել եմ, արդէն ինչ-որ ժամանակ կառավարութեան անդամ չեմ, բայց մասնագիտական իմ հետաքրքրութիւնների շրջանակում ասեմ, որ շատ քիչ երկրներ կան, որ այսպիսի յաջողութիւններ են արձանագրել, շատ քիչ երկրներ կան, որ համաշխարհային տնտեսական ծանր պայմաններում կարողացել են իրենց հնարաւորութիւնները առաւելագոյն օգտագործել: Ես Ձեզ կարող եմ ասել, գնահատական տալ, որ սա պայմանաւորուած է ոչ թէ մէկ տարուայ աշխատանքով, այլեւ վերջին չորս տարիներին կատարած բարեփոխումներով: Սա ուզում եմ, որ նաեւ Դուք ուղղակի որպէս մասնագէտի գնահատական ընդունէք, որովհետեւ ինձ հետաքրքրում էր, թէ ինչպէ՞ս է ստացւում, որ մեզ մօտ այսպիսի յաջողութիւններ ենք ունենում:
Դա պայմանաւորուած է հիմնականում նրանով, որ մեզ մօտ առեւտուրը հիմնականում ազատուել է բոլոր կապանքներից, ազատ գործում է, որտեղ ցանկանում է, ինչպէս ցանկանում է: Կառավարութիւնը շատ յաջողութեամբ կարողանում է իր լծակներն օգտագործել, յատկապէս` տնտեսական օրէնքների առումով, այդ թւում` հարկային, եւ նաեւ ինչու չէ, վարչական լծակները հնարաւորինս հեռու պահելով` թուլացնելով: Եւ մի կարեւոր հանգամանք կայ, որին ես երազում էի, որ մի օր գայ, որ մենք մի երկիր ունենանք, որտեղ գործարարը շահագրգռուած լինի պետութեան հետ աշխատել աւելի ազնիւ, աւելի բաց, հարկերը վճարի: Հիմա, երբ մենք եկող տարի անցնում ենք նաեւ հարկային ելեկտրոնային հաշուետուութիւնների, կարծում եմ, դա հնարաւորութիւն է եւ փորձը երեւի ցոյց կը տայ, որ այդտեղ պէտք չէ ի սկզբանէ մտածել` գործարարը, հարկատուն յանցաւոր մտածողութեամբ են աշխատում: Միշտ այդպէս է եղել, Խորհրդային Միութիւնից եկող:
Հիմա, կարծում եմ, Դուք կարողացել էք փոխել այդ մտայնութիւնը եւ եկող տարի առեւտուրն իր պատասխանը կը տայ լաւ իմաստով եւ մենք կարող ենք արձանագրել յաջողութիւններ: Այդ առումով, ուզում եմ առիթն օգտագործել, շնորհաւորել Ձեզ ձեռքբերումների համար: Հասկանում եմ, որ շատ դժուար ժամանակներ են կառավարութեան համար: Վերջին իրադարձութիւններն առաւել եւս, բայց համոզուած եմ, որ սրանով մեր ուղղուց պէտք է չշեղեն, եւ հիմնականում այս արհեստական դժուարութիւնները հէնց միտուած են դրան, որպէսզի շեղուենք եւ զբաղուենք աւելի կարեւոր գործերով, բայց կարծում եմ, որ, Դուք միշտ էլ դա նշում էք, որ բոլոր գործերն են կարեւոր, եւ մենք պէտք է բոլոր այդ կարեւոր գործերը կարողանանք յաջողութեամբ աւարտել»:
Իր հերթին վարչապետ Փաշինեան նշած է. «Շնորհակալ եմ, մեծարգոյ պարոն նախագահ: Շնորհակալ եմ հիւրընկալութեան համար: Այո, Դուք ճիշդ էք նշում, մենք, իրականում, շատ յաճախ ենք շփւում, շատ յաճախ ենք խօսում, քննարկումներ ունենում ե՛ւ Անվտանգութեան Խորհրդի նիստերին, ե՛ւ աշխատանքային խորհրդակցութիւններին, բայց կարծում եմ, որ նաեւ այս ձեւաչափով աշխատանքային քննարկումները շատ կարեւոր են նաեւ, որպէսզի ժամանակ առ ժամանակ մենք նաեւ ամփոփենք արդիւնքները եւ առաջիկայի մասին խօսենք:
Կ’ուզեմ շնորհակալութիւն յայտնել տնտեսական ցուցանիշների վերաբերեալ գնահատականի կապակցութեամբ: Ի հարկէ, դա կարեւոր է, եւ լիարժէք համաձայն եմ, որ տնտեսական աճի հեղինակը, իրականում ոչ թէ կառավարութիւնն է, այլ այն մարդիկ, ովքեր ստեղծում են այդ աճը, այլ բան, որ կառավարութիւնը պէտք է չխանգարի նրանց տնտեսութիւնը զարգացնելու գործում: Երկրորդն էլ` որտեղ հնարաւոր է օգնել եւ այնտեղ, որտեղ կարող է օգնել եւ ինչով կարող է օգնել, օգնի: Մենք էլ այդ տրամաբանութեամբ ենք առաջնորդւում: Ի հարկէ, այս առումով, շատ կարեւոր է հաւասար մրցակցային դաշտի ապահովումը եւ, ի հարկէ, նաեւ կարգաւորումը` բիւրոկրատական քաշքշուկների կրճատումը, ներդրումային միջավայրի բարելաւումը: Այստեղ շատ անելիքներ կան, մենք բազմիցս ենք այդ թեմաներով խօսել: Եւ մենք այդ բարեփոխումների օրակարգին միանշանակ նուիրուած ենք: Իհարկէ, անվտանգային միջավայրի հետ կապուած հարցերը շատ աւելի մեծ ժամանակ են խլում, հասկանալիօրէն: Լաչինի միջանցքում ստեղծուած իրավիճակը մտահոգիչ է եւ դատապարտելի, որ ի հեճուկս Նոյեմբերի 9-ի եռակողմ յայտարարութեան, ունենք այն, ինչ ունենք: Իսկ Նոյեմբերի 9-ի եռակողմ յայտարարութեամբ նման իրավիճակ չպէտք է լինէր ընդհանրապէս եւ յոյս ունեմ, որ նաեւ միջազգային մեր գործընկերների ջանքերի եւ ուղիղ հաղորդակցութիւնների, նաեւ որոշակի քննարկումների արդիւնքում մեզ կը յաջողուի այս իրավիճակը կարգաւորել, ընդհանուր առմամբ, տարածաշրջանում երկարատեւ կայունութեան եւ խաղաղութեան հասնել:
Համոզուած եմ` այսօր մենք օրակարգի այս բոլոր հարցերը մանրամասն կը քննարկենք: Չնայած, կրկին եմ ասում, մենք պարբերաբար հանդիպում ենք, եւ ես շատ ուրախ եմ ու շնորհակալ դրա համար, որ լիարժէք հաղորդակցութիւն կայ ե՛ւ մեր միջեւ անձնապէս, ե՛ւ նախագահի աշխատակազմի ու կառավարութեան աշխատակազմի միջեւ: Դա շատ կարեւոր է պատշաճ աշխատանքային մթնոլորտ ապահովելու համար»:
