Ատրպէյճանը Արցախը Հայաստանին կապող միակ ճանապարհը բանալու նախապայմաններ կը դնէ, «Ազատութեան» հարցին ի պատասխան` յայտնած է Արցախի պետական նախարարի խորհրդական Արտակ Բեկլարեանը:
Շաբաթ օր Ռուսիոյ Պաշտպանութեան Նախարարութիւնը յայտարարեց, որ բանակցային գործընթացի ընթացքին ռուսական խաղաղապահներուն հրամանատարութիւնը կը սպասէ հայկական ու ատրպէյճանական կողմերու պատասխանին իրավիճակի կարգաւորման վերաբերեալ իրենց առաջարկներուն: Թէ ինչ առաջարկներ են անոնք, կողմերէն մէկը չէ բացայայտած:
Երեւան գտնուող Արցախի պետական նախարարին խորհրդականը հաստատեց, որ բանակցութիւններ կ’ընթանան: Բեկլարեանի խօսքով` Արցախի բոլոր երկխօսութիւնները, ուղիղ շփումները Ատրպէյճանի հետ տեղի կ’ունենան ռուսական միջնորդութեամբ:
Լաչինի միջանցքը արդէն 8-րդ օրն է` բնապահպան ներկայացող ատրպէյճանցիները փակ կը պահեն: Անոնցմր առաջ Ատրպէյճանի պետական քանի մը գերատեսչութիւններու, անոնց շարքին` Բնական Միջոցներու Նախարարութեան ու Պետական Գոյքի Վարչութեան աշխատակիցները վերահսկողութիւն կը պահանջէին Արցախի Տրմպոնի ու Գաշենի հանքավայրերուն մէջ: Արցախցի պաշտօնեան հաստատեց, որ ճանապարհի բացման համար ատրպէյճանցիներուն յառաջ քաշած նախապայմաններէն մէկը մուտք գործելն է Գաշենի հանքավայր: Բայց թէ ինչ պատասխանած է Ստեփանակերտը, չըսաւ:
Աւելի առաջ Արցախէն ըսած էին, որ համաձայն են միայն միջազգային փորձագէտներու վերահսկողութեան: Ըստ պետական նախարարի խորհրդականին` Ատրպէյճանի ռազմավարական նպատակը Արցախի ժողովուրդին հայրենազրկումը, ցեղասպանութիւնն է. «Այո՛, բանակցութիւններում նաեւ նմանատիպ հարցեր են քննարկուել, այսինքն` նախապայման է եղել ատրպէյճանական կողմից, թէ ինչ ձեւով, ինչ յաճախականութեամբ` մէկանգամեայ, թէ ոչ, թէ վերահսկողութիւն ինչպէս պէտք է լինի եւ այլն, սրանք բոլորը մանրամասներ են, որոնք ես չեմ կարող մեկնաբանել, բայց անձամբ իմ կարծիքն է, որ Արցախը որեւէ կարմիր գծի զիջման հաշուին պէտք չէ համաձայնութեան գայ»:
