Պոլսոյ Հայոց պատրիարք Սահակ Մաշալեանը Թուրքիոյ արտաքին գործերու նախարար Մեւլութ Չաւուշօղլուի հրաւէրով Յունիս 9-ին այցելած է Թուրքիոյ Արտաքին Գործերու Նախարարութիւն եւ հանդիպած է անոր հետ:
Այս մասին կը տեղեկացնէ Պոլսոյ Հայոց պատրիարքարանի ֆէյսպուքի էջը:
Սահակ Մաշալեանի հետ Թուրքիոյ Արտաքին Գործերու Նախարարութիւն այցելած է նաեւ Արեւմտեան Եւրոպայի Հայրապետական Պատուիրակ եւ Վատիկանի Հայ Առաքելական եկեղեցւոյ ներկայացուցիչ` Գերշ. Տ. Խաժակ Ս. արքեպիսկոպոս Պարսամեանը:
Հանդիպման ժամանակ Չաւուշօղլուն հետաքրքրուած է համայնքային ընտրութիւններու թեմայով եւ յայտնած է, որ կանոնադրութեան կազմման աշխատանքները հասած են վերջին փուլին եւ յոյս յայտնած, որ շուտով պիտի հրապարակուի:
Խաժակ Սրբազանը Չաւուշօղլուին տեղեկացուցած է, որ Սուրբ Ներսէս Շնորհալիի մահուան 850- ամեակին նուիրուած արարողութիւններ կը նախատեսուին, ինչպէս Հռոմի, այնպէս ալ այլ վայրերու մէջ, ուր հայեր կան:
Չաւուշօղլուն հանդիպման ժամանակ խոստացած է Սթամպուլի մէջ ըլլալու պարագային այցելել պատրիարքարան:
