Հինգշաբթի, Հոկտեմբեր 28-ին Սոցիալ Դեմոկրատ Հնչակեան Կուսակցութեան Արեւմտեան Ամերիկայի Վարիչ Մարմինը ներկայացնող պատուիրակութիւն մը հանդիպում ունեցաւ Արցախի պետական նախարար (վարչապետ) Արտակ Բեգլարեանի հետ, որ Միացեալ Նահանգներ կ’այցելէ Հայ Աւետարանչական Ընկերակցութեան հրաւէրով:
Հանդիպումի ընթացքին Պր. Բեգլարեան ներկայացուց Արցախի մէջ տիրող ներկայ Ապահովական, տնտեսական, առողջապահական եւ բնակարանյին իրավիճակը, լաւատեսութիւն յայտնելով Արցախահայութեան ապագայի նկատմամբ: Ան կարեւորեց Հայաստանի կառավարութեան տրամադրած օժանդակութիւնները եւ «Հայաստան» Համահայկական Հիմնադրամի միջոցաւ իրականացուող ծրագիրները Արցախի տարածքին:
Հնչակեան պատուիրակութիւնը գնահատեց պետական նախարարի հրապարակային ելոյթները, որոնք ոգեւորութիւն կը յառաջացնեն ունկնդիրներուն մօտ ու կը նպաստեն պատերազմի հետեւանքով ժողովուրդի մօտ յառաջացած հոգեբանական վիճակի բարելաւման:
ՍԴՀԿ անդամները պատրաստակամութիւն յայտնեցին շարունակելու համագործակցութիւնը Արցախի կառավարութեան հետ:
Հանդիպումի ընթացքին անդրադարձ եղաւ նաեւ «Հայաստան» Հիմնադրամի տեղական վարչութեան առնչուող հարցերուն:
ՍԴՀԿ պատուիրակութեան մաս կը կազմէին ընկերներ` Վազգէն Խոտանեան, Վարդան Քորողլեան եւ Միհրան Խաչատուրեան: