Պոլսոյ Հայոց պատրիարքարանի Հոգեւոր խորհուրդը որոշում կայացուցած է նոր պատրիարքի ընտրութեան երթալ պատրիարքական ընդհանուր փոխանորդ Արամ արքեպիսկոպոս Աթէշեանի ղեկավարութեամբ:
Պատրիարք Մեսրոպ Մութաֆեանի մահուան առիթով յայտարարուած 40-օրեայ սուգէն ետք նախօրէին գումարուած առաջին ժողովի ընթացքին քուէարկութեան դրուած է հետեւեալ հարցը՝ նոր պատրիարքի ընտրութեան գործընթացը համակարգել փոխանորդի՞ միջոցով, թէ՞ անհրաժեշտ է տեղապահ ընտրել: Եկեղեցական կանոնադրութեան եւ աւանդոյթներու համաձայն՝ պատրիարքի վախճանէն ետք տեղապահ կ’ընտրուի, որն ալ կը ղեկավարէ պատրիարքարանը մինչեւ նոր առաջնորդի ընտրութիւնը: Սակայն 2010 թուականէն ի վեր պատրիարքական փոխանորդի պաշտօնը զբաղեցնող Արամ Աթէշեանը օրերս յայտարարած էր, թէ դէմ է տեղապահի ընտրութեան եւ ինքը՝ որպէս փոխանորդ, կը պատրաստուի համակարգել պատրիարքական գալիք ընտրութիւնները:
Ժողովի ժամանակ փակ գաղտնի քուէարկութեան արդիւնքով Հոգեւոր խորհուրդի անդամներէն 5-ը կողմ քուէարկած են գործընթացը պատրիարքական փոխանորդի միջոցով շարունակելու օգտին, 3 անդամ կողմ արտայայտուած է տեղապահ ընտրելու տարբերակին, եւս մէկը ձեռնպահ մնացած է: Այսպիսով, որոշում ընդունուած է Արամ արքեպիսկոպոս Աթէշեանի եւ կրօնական ժողովի ընդհանուր ստորագրութեամբ յառաջիկայ օրերուն դիմում ներկայացնել Իսթանպուլի նահանգապետարան Պոլսոյ Հայոց 85-րդ պատրիարքի ընտրութեան ժամանակացոյցը պետական մարմիններու հետ համաձայնեցնելու համար:
Նախօրէին կայացած ժողովէն առաջ պոլսահայ իրաւաբաններ Սեդրակ Տաւութհանը եւ Սեպուհ Ասլանկիլը «Ակօս» պարբերականի հետ զրոյցի ժամանակ ընդգծած են, որ եկեղեցական աւանդոյթներու համաձայն՝ նոր պատրիարքի ընտրութեան գործընթացը պէտք է գլխաւորէ պատրիարքական տեղապահը: Աւելի վաղ նման կարծիք յայտնած էր նաեւ պատրիարքարանի կրօնական ժողովի ատենապետ Սահակ եպիսկոպոս Մաշալեանը՝ յայտարարելով, որ կը պատրաստուի առաջադրել իր թեկնածութիւնը տեղապահի պաշտօնին:
Երկարատեւ ու ծանր հիւանդութենէ ետք Պոլսոյ Հայոց 84-րդ պատրիարք Մեսրոպ արքեպիսկոպոս Մութաֆեանը վախճանած էր այս տարուան Մարտի 8-ին՝ 62 տարեկան հասակին: