Հռոմի Ֆրանչիսկոս պապը հաւատացեալներուն ուղղուած Սուրբ Ծննդեան ուղերձին մէջ դատապարտած է պատերազմները, որոնք կը սնուին զէնքի արտադրութեամբ։
«Պատերազմը միշտ ճանապարհորդութիւն է առանց նպատակակէտի, պարտութիւն՝ առանց յաղթողներու, խելագարութիւն՝ առանց արդարացումներու: Բայց պատերազմին «ոչ» ըսելու համար պէտք է «ոչ» ըսել զէնքին: Եթէ մարդու սիրտը դժգոհ է ու վիրաւոր, իր ձեռքին ան պիտի գտնէ մահուան գործիքը եւ վաղ թէ ուշ զայն պիտի օգտագործէ։ Իսկ ինչպէ՞ս կարելի է խօսիլ խաղաղութեան մասին, եթէ զէնքի արտադրութիւնը, վաճառքը, առեւտուրը կ’աճին: Ես կը խնդրեմ ձեզ դադրեցնել ռազմական գործողութիւնները, որոնք կը յանգեցնեն անմեղ զոհերու», ըսած է պապը։
Հռոմի պապը խօսած է նաեւ Հայաստանի եւ Ատրպէյճանի յարաբերութիւններէն։
«Նայելով Մանուկ Յիսուսին՝ ես կ’աղօթեմ Ուքրանիոյ խաղաղութեան համար, մենք մեր հոգեւոր մտերմութիւնը կը յայտնենք անոր նահատակ ժողովուրդին: Թող մօտենայ Հայաստանի եւ Ատրպէյճանի միջեւ լիակատար հաշտեցման օրը: Թող անոր նպաստեն մարդասիրական նախաձեռնութիւնները, անոնց վերադարձը, որոնք լքած են իրենց տուները, եւ որեւէ համայնքի կրօնական աւանդոյթներու եւ պաշտամունքի վայրերու նկատմամբ յարգանքը», ըսած է Կաթոլիկ եկեղեցւոյ հոգեւոր առաջնորդը։
