Համաշխարհային տնտեսութեան համար դժուարին իրավիճակի պայմաններուն մէջ Հայաստանի մէջ նախնական հաշուարկներով այս տարեվերջին կ’ակնկալուի 11 տոկոս տնտեսական աճ: Հայաստանի տնտեսութեան մէջ նկատուող աճի համար յաւելեալ խթան հանդիսացած են նաեւ մեծ թիւով օտարերկրեայ ընկերութիւններու Հայաստան տեղափոխուիլը, արձանագրուիլը, աշխատուժի ներհոսքը: Այս եւ Հայաստանի տնտեսութեան մէջ արձանագրուած ու նկատուող զարգացումներուն մասին խօսեցաւ Հայաստանի Հանրապետութեան նախագահ Վահագն Խաչատուրեանը` Պուլկարիոյ Սուրբ Քլիմենթ Օհռիտսքի անուան համալսարանին մէջ «Հայաստանի տնտեսութիւն. Առերեսուելով համընդհանուր եւ տարածաշրջանային մարտահրաւէրներուն» խորագրով դասախօսութեան:
Խաչատուրեան նախ խօսեցաւ Հայաստանի տնտեսութեան մէջ տարբեր ժամանակներուն արձանագրուած անկման մասին, յիշեցուց 2009 թուականի ֆինանսական ճգնաժամին մասին, որուն ազդեցութենէն անմասն չէր մնացած նաեւ Հայաստանը: Ապա` խօսեցաւ նաեւ 2016-ի տնտեսական անկումէն, որ պայմանաւորուած էր Ռուսիոյ նկատմամբ պատժամիջոցներու կիրառմամբ: Նախագահը ընդգծեց, որ Հայաստանի տնտեսութիւնը շատ խոր համարկուած է Ռուսիոյ տնտեսութեան: Հայաստանը 2013-էն կը հանդիսանայ ԵԱՏՄ-ի անդամ: Սակայն Խաչատուրեան շեշտեց, որ միաժամանակ Հայաստանը շատ աշխոյժ կը համագործակցի ԵՄ-ի հետ, անցեալ տարի ուժի մէջ մտած է ՀՀ-ԵՄ Համապարփակ եւ ընդլայնուած գործընկերութեան համաձայնագիրը: «Մենք կարողանում ենք օգտուել ԵՄ-ի հետ համագործակցութիւնից, միաժամանակ ունենք 170 միլիոնանոց ԵԱՏՄ, որից կարող ենք օգտուել: Այդ թւում` նաեւ պուլկարական առեւտուրի ներկայացուցիչները կարող են օգտուել այդ առաւելութիւնից` օգտագործելով Հայաստանի տարածքը», նշեց նախագահը:
Հայաստանի տնտեսութեան յաջորդ խոր անկումը նկատուած է 2020 թուականին` Քովիտի, պատերազմի ազդեցութեամբ պայմանաւորուած: Իսկ 2021-ին կրկին արձանագրուած է տնտեսական աճ:
«Այս տարի աննախադէպ տնտեսական աճ է լինելու, նախնական հաշուարկներով` 11 տոկոս: Կարծում եմ` այսօրուայ համաշխարհային տնտեսութեան ճգնաժամի պայմաններում այսպիսի տնտեսական աճ գրանցելը բաւականին հետաքրքիր է, մասնագէտների ուսումնասիրութեան կարիք ունի, բայց Հայաստանը կարողացել էէ», ըսաւ Խաչատուրեան:
Խօսելով տնտեսական նման բարձր աճի պատճառներէն` ՀՀ նախագահը նշեց, որ ռուս-ուքրանական հակամարտութենէն յետոյ Ռուսիոյ, Պելառուսիոյ, Ուքրանիոյ կողմէ դէպի Հայաստան աշխատուժի ներհոսքը էականօրէն մեծցած է: Այդ ներհոսքը հիմնականին մէջ ապահոված են տեղեկատուական արհեստագիտութեան բնագաւառի որակեալ մասնագէտներ: «Եւ հաշուի առնելով ՀՀ տնտեսական, յատկապէս հարկային քաղաքականութիւնը` մօտ 70 ընկերութիւններ գրանցուեցին Հայաստանում: ՀՀ կառավարութիւնն էլ շատ արագ արձագանգեց այդ ընկերութիւնների պահանջներին: Եւ բարենպաստ պայմանները գրաւեցին ռուսական, ուքրանական եւ պելառուսական` բարձր արհեստագիտական, տեղեկատուական արհեստագիտութեան բնագաւառի ներկայացուցիչներին, որ հիմնուեն Հայաստանում: Իսկ դա լրացուցիչ տնտեսական խթան է մեզ համար: Մենք մինչեւ հիմա շարունակում ենք առանձնայատուկ ուշադրութիւն դարձնել այդ բնագաւառին, օտարերկրեայ ընկերութիւններին, որոնք արդէն դարձել են հայկական ընկերութիւններ, որովհետեւ իրենք պաշտօնապէս այլեւս այն ընկերութիւնները չեն, որոնք կային», ըսաւ նախագահը:
Խաչատուրեանը տեղեկացուց նաեւ, որ Հայաստան եկող զբօսաշրջիկներուն թիւը էականօրէն աճած է` այս տարուան առաջին կիսամեակին հասնելով 589 հազարի, ապրանքներու արտահանման ծաւալը եւս էապէս աւելցած է դէպի Ռուսիա: Անոր խօսքով` դրամական փոխանցումները, որոնք միշտ դեր ունեցած են Հայաստանի կեանքին մէջ, եթէ նախապէս եղած են ՀՆԱ-ի 10-12 տոկոսը, ապա այս տարի կը կազմեն մօտ 18 տոկոս:
Թէ ինչու Հայաստանը գրաւիչ է` նաան պարզաբանեց, որ լաւ կարգաւորումներու, բաւական մատչելիութեան եւ ազատութեան համար: Առեւտուր արձանագրելը Հայաստանի մէջ կը տեւէ 1 օր, նոյնիսկ ժամեր, քանի որ արձանագրութիւնը կը կատարուի ելեկտրոնային եղանակով, դրամատնային համակարգին մէջ հաշիւ բանալու խնդիր եւս չկայ:
Նախագահը ընդգծեց նաեւ Հայաստանէն արտահանման ծաւալներու յաւելման, գործազրկութեան մակարդակի նուազեցման եւ այլ ցուցանիշներու մասին: