Հայաստանի մէջ «Քորոնա» ժահրով վարակուած 110 մարդէ միայն երկուքը ունի թոքաբորբ, բայց անոնց վիճակը լաւ է, ֆէյսպուքեան ուղիղ եթերով տեղեկացուց վարչապետ Նիկոլ Փաշինեան: Նշենք նաեւ, որ «Նորք» վարակաբանութեան հիւանդանոցին մէջ, երկկողմանի թոքաբորբէն մահացած հիւանդին մօտ «Քորոնա» ժահր չէ յայտնաբերուած:
Այս օրերուն, «Քորոնա» ժահրի 700-է աւելի քննութիւն տեղի ունեցած է, հաստատուած դէպքերէն 17-ը քննութեան պահուն որեւէ գանգատ չէ ունեցած:
«81 տոկոսն է դէպքերի արտադրամասի եւ Էջմիածնի դէպքը, մնացած դէպքերը դրանք տեղային դէպքեր են», – յայտարարեց վարչապետը:
Մեկուսացուածներու թիւը, վարչապետի առաւօտեան ուղիղ եթերի հրապարակած տուեալներով, հասած է 444-ի, նաեւ 799 անձի ալ իշխանութիւնները յորդորած են ինքնամեկուսանալ:
«Եթէ մեկուսացման անհրաժեշտութեան ծաւալները մեծանան, այդ գործողութիւնը սկզբունքօրէն կը դառնայ անիմաստ», – նշեց Փաշինեան:
Հայաստան այս օրերուն, օրական 11 հազար լիթր ալքոհոլ կ’արտադրուի, որու շուրջ 50 տոկոսը կ’օգտագործուի ախտահանիչ միջոցներու արտադրութեան մէջ։ Վարչապետը կը կարծէ, որ ախտահանիչի պակասը ամենայն հաւանականութեամբ պայմանաւորուած է խուճապային գնումներով:
«Վաճառքի տուեալները ցոյց են տալիս, որ այսօր մեր սիրելի հայրենակիցների տներում ահռելի մեծ քանակութեամբ ախտահանիչ է կուտակուած», – ըսաւ Հայաստանի կառավարութեան ղեկավարը: