Home ԳԼԽԱՒՈՐ ԼՈՒՐԵՐ Ուսողութեան Միջազգային Ողիմպիական Մրցումներուն Հայաստանի Խումբերը Նուաճած են 8 Մետալ

Ուսողութեան Միջազգային Ողիմպիական Մրցումներուն Հայաստանի Խումբերը Նուաճած են 8 Մետալ

by MassisPost

31 Յուլիսէն 6 Օգոստոսը Պուլկարիոյ Պլակոեւկրատ քաղաքին մէջ տեղի ունեցած է 24-րդ մաթեմատիկական միջազգային ուսանողական ողիմպիականը (IMC), որուն մասնակցած են աշխարհի 71 համալսարաններու խումբեր (331 մասնակից): Մրցոյթին Հայաստանը ներկայացուցած են Երեւանի Պետական, Հայաստանի Ամերիկեան եւ Սլաւոնական համալսարաններու խումբերը:

ՀՀ խումբերը բարձր արդիւնքներ արձանագրած են՝ նուաճելով երկու ոսկէ, երկու արծաթէ եւ երկու բրոնզէ մետալ: Երեւանի Պետական համալսարանը ներկայացուած էր 4 մասնակիցներով, որոնցմէ երկուքը՝ Ալպերթ Գէորգեան եւ Վազգէն Միքայէլեան, արժանացած են ոսկէ, իսկ Աւետիք Կարագուլեան եւ Գէորգ Մնացականեան՝ արծաթէ մետալներու: Ողիմպիականը կայացած է ե՛ւ անհատական, ե՛ւ խմբային հաշուարկներով: Ալպերթ Գէորգեան անհատական հաշուարկով զբաղեցուցած է պատուաւոր 15-րդ տեղը: Խմբային առաջնութեան Երեւանի Պետական համալսարանի խումբը գրաւած է 7-րդ տեղը: Այս աննախադէպ արդիւնք է ԵՊՀ-ի խումբին համար: Մինչեւ օրս խմբային հաշուարկի լաւագոյն արդիւնքը եղած է 15-րդ տեղը: Հայաստանի Ամերիկեան համալսարանի ուսանող Արտիոմ Քոսեան եւ Սլաւոնական համալսարանի սան Հրաչեայ Քոչարեան արժանացած են բրոնզէ մետալներու:

Ուսանողական միջազգային Ողիմպիականի Հայաստանի խումբերը ղեկավարած եւ մարզած է ԵՊՀ եւ ՀԱՀ դասախօս Կարէն Քեռեան, որ խումբի ղեկավարներէն արդիւնաւէտութեամբ 4-րդն էր: Նշենք, որ Մաթեմատիկայի միջազգային ուսանողական Ողիմպիականին առաջին տեղը զբաղեցուցած է Իսրայէլի ազգային խումբը, իսկ երկրորդ եւ երրորդ տեղերը գրաւած են Փեթերսպուրկի Պետական համալսարանի եւ Մոսկուայի ֆիզիկատեխնոլոգիական հիմնարկի խումբերը: IMC ուսանողական միջազգային մաթեմատիկական Ողիմպիականը առաջին անգամ կայացած է 1994 թուականին:

Հարակից Նյութեր

Leave a Comment