Ռուսիոյ Արտաքին գործոց նախարար Սերկէյ Լաւրով ատրպէյճանական APA լրատուական գործակալութեան տուած հարցազրոյցին ըսած է, թէ Լեռնային Ղարաբաղի հակամարտութեան կարգաւորման «Լաւրովի ծրագիր» գոյութիւն չունի: Ան նշած է, որ ներկայիս քննարկուող գաղափարի հենքը ԵԱՀԿ Մինսքի խումբի համանախագահ երեք երկիրներու կողմէ մշակուած առաջարկն է:
Ան նշած է, որ համանախագահներու մշակած կարգաւորման նախագիծը արմատապէս փոխելու կամ ինչ-որ նոր ծրագիրներ առաջարկելու մասին խօսք չ’երթար: Գլխաւորը՝ օգնել կողմերուն՝ գտնել հաւասարակշռուած քաղաքական լուծում, որ թոյլ կու տայ անցնիլ իրաւաբանօրէն պարտաւորեցնող փաստաթուղթերու պատրաստման, ըսած է ան: Լաւրովի խօսքերով՝ կարգաւորման շատ բաղադրիչներ արդէն համաձայնեցուած են. – «Մնացած են մի քանի հարցեր: Բայց անոնք ամենաբարդն են: Համաձայնութեան գալ դեռ չէ յաջողուած: Ամէն պարագայի աշխատանքը կը շարունակուի»:
Ռուսաստանի հետաքրքրութիւններու առումով, ան ըսած է, որ ղարաբաղեան հակամարտութեան չկարգաւորուած իրավիճակը կ’անհանգստացնէ Ռուսիոյ: «Ղարաբաղեան կարգաւորումը մեր արտաքին քաղաքականութեան առաջնահերթութիւններէն մէկն է», – ընդգծած է Ռուսիոյ արտաքին գործոց նախարարը:
Լաւրովը չէ համաձայնած լրագրողի հնչեցուցած դիտարկման, թէ վերջին տարիներուն կարգաւորման ուղղութեամբ քայլեր չեն առնուած: «Ղարաբաղեան թեման մշտապէս կը գտնուի միջազգային միջնորդներու ուշադրութեան կեդրոնին, կը ձեռնարկուին ինչպէս խմբային, այնպէս ալ ինքնուրոյն ջանքեր այդ խնդրի կարգաւորման ուղղութեամբ», – ըսած է ան:
Սերկէյ Լաւրով գովաբանած է ԵԱՀԿ Մինսքի խումբի համանախագահութեան ծիրէն ներս Ռուսիոյ, ԱՄՆ-ի եւ Ֆրանսայի համագործակցութիւնը, նշելով՝ այդպիսի խմբային աշխատանքը կը վկայէ, թէ ինչպէս պէտք է համագործակցիլ միջազգային հակամարտութիւնները յաղթահարելու հարցերուն պարագային:
Ինչ կը վերաբերի ռուսական կողմի ջանքերուն, Լաւրով ըսած է, թէ Ատրպէյճանի եւ Հայաստանի ղեկավարներու հետ Ռուսիոյ նախագահ Վլատիմիր Փութինի հանդիպումներուն ղարաբաղեան կարգաւորման խնդիրը անտարակոյս կարեւոր տեղ կը գրաւէ: «Մասնաւորապէս, առարկայական քննարկում տեղի ունեցած է Սերժ Սարգսեանի 15 մարտին Մոսկուա կատարած այցի ժամանակ», – յայտնած է Լաւրով: