Վերջին օրերին կրկին սրվել է Լիբանանի ներքաղաքական կյանքը: Մի քանի օր առաջ ընդդիմադիր «Հզբոլլահ» շարժումը «զենքի ցուցադրություն» էր անցկացրել օդանավակայանում` երբ բազմաթիվ զինված հզբոլլահականներ ժամանել էին օդակայան` նպատակ ունենալով արգելել կառավարությանը ձերբակալել Փարիզից Բեյրութ ժամանող և հետախուզման մեջ գտնվող իրենց համակրին:
Այս առիթով HayNews.am-ը խոսեց Լիբանանի Ազգային ժողովի պատգամավոր, ՍԴՀԿ ԿՎ փոխատենապետ Սեպուհ Կալպակյանի հետ: Վերջինս նշեց, որ «այս ամենին գումարվել է ՄԱԿ-ի հատուկ դատարանում առկա գործընթացը, որտեղ լսվում է նահատակ վարչապետ Ռաֆիկ Հարիրիի սպանության գործը»:
Պարոն Կալպակյանը փոխանցեց, որ «Հզբոլլահի» հետ հարաբերությունները լարվել են այն բանից հետո, երբ դատարանում մի քանի հոգի սուտ ցուցմունք են տվել:
«Իրականում այդ մարդկանց խոսքը որևէ ազդեցություն ունենալ չէր կարող, սակայն «Հզբոլլահն» այն օգտագործեց խնդրի հիմնական մասից հասարակության ուշադրությունը շեղելու համար: Այժմ իրենք պահանջում են, որ սուտ ցուցմունքներ տվողները կանգնեն դատարանի առջև: Վարչապետ Սաադ Հարիրին, ով ներկա կացության պատճառով ընդհատեց իր այցելությունը Սաուդյան Արաբիա և շտապ կերպով վերադարձավ Բեյրութ, համաձայնել է «Հզբոլլահի» առաջարկների հետ և այսօր կառավարության նիստ է տեղի ունենալու: Կառավարության նիստի արդյունքներից էլ կախված է, թե երկրի ներքաղաքական կացությունն ինչպես կզարգանա»:
Sign Up for Our Newsletters
Get notified of the latest updates from MassisPost.
