Հայ Ամերիկեան խորհուրդը (ACA) կը յայտնէ, թէ Քոնկրեսական Ֆրենք Փալոնին (Դեմոկրատ, Նիւ Ճըրզի) յանձնած է «Ստեփան Սապահ-Կիւլեանի» անուան «Արժանապատուութեան» մրցանակը` ի նշան հայ-ամերիկեան հարցերու մէջ անոր տասնամեակներու ցուցաբերած անսասան առաջնորդութեան:
Մրցանակը յանձնեց Հայ Ամերիկեան խորհուրդի կառավարական յարաբերութիւններու գործադիր տնօրէն Թանիել Քուշակճեան` քոնկրեսականի Քափիթոլի գրասենեակին մէջ կազմակերպուած յատուկ արարողութեան ընթացքին:
Քոնկրեսական Փալոնը 1995 թուականին համահիմնադրեց Քոնկրեսի Հայկական հարցերով խումբը եւ այդ ժամանակէն ի վեր կը հանդիսանայ այդ երկկուսակցական կառոյցին համանախագահներէն մէկը: Անոր գործունէութիւնը վճռորոշ դեր ունեցած է Ամերիկայի Միացեալ Նահանգներու կողմէ Հայոց Ցեղասպանութեան ճանաչման, ԱՄՆ-Հայաստան յարաբերութիւններու ամրապնդման, ինչպէս նաեւ մարդու իրաւունքներու եւ պատասխանատուութեան վրայ հիմնուած քաղաքականութիւններու պաշտպանութեան մէջ:
«Քոնկրեսական Փալոնի առաջնորդութիւնը Քոնկրեսի մէջ` Հայաստանի եւ հայ-ամերիկեան հարցերու շուրջ, օրինակելի է»,— նշած է Թանիել Քուշակճեան` Հայ-ամերիկեան խորհուրդի Ուաշինգթընի մէջ գործող կառավարական յարաբերութիւններու գործադիր տնօրէնը: «Այս մրցանակը կը գնահատէ ոչ միայն անոր տասնամեակներու ծառայութիւնը, այլեւ արժեհամակարգը` հիմնուած ազնուութեան եւ խիզախութեան վրայ, որ կը շարունակէ ձեւաւորել Ամերիկեան քաղաքականութիւնը եւ ոգեշնչել ապագայ սերունդները»,— աւելցուցած է Քուշակճեան:
Մրցանակը կը շնորհուի այն անձերուն, որոնց ազնուութիւնը, խիզախութիւնը եւ արդարութեան նկատմամբ նուիրուածութիւնը կ’արտացոլեն Ստեփան Սապահ-Կիւլեանի ժառանգութիւնը: Քոնկրեսական Փալոնի երկարամեայ գործունէութիւնը` որպէս Քոնկրեսի Հայկական հարցերով խումբի համանախագահ, մնայուն ազդեցութիւն ունեցած է թէ’ հայ-ամերիկեան համայնքին, թէ’ Ամերիկայի Միացեալ Նահանգներու արտաքին քաղաքականութեան վրայ: Հայ-ամերիկեան խորհուրդը հպարտ է գնահատել անոր շարունակական նուիրումը` ուղղուած ճշմարտութեան, արդարութեան եւ սկզբունքային առաջնորդութեան:
